UZOPHEKA NGEMIBUZO OSOPOLITIKI NEZIKHULU UCHESTER MISSING
KULINDELEKE lushubise ngezindaba ezithinta ipolitiki nohulumeni uhlelo lukapopayi uChester Missing osezakhele udumo ngokubuza imibuzo eshubilile kodwa ngendlela ehlekisayo ezikhulwini ezahlukene kuleli. UChester Missing oyi- ventriloquist uzoba nohlelo lwakhe esiteshini sikamabonakude esizimele sezindaba i-eNCA olubizwa nge-Almost News With Chester Missing kusukela ngeSonto ngomhla ka-25 kwephezulu seligamenxe elesikhombisa kusihlwa. Ngokwesitatimende lolu hlelo luzogxila ezindabeni ezisematheni ngaleso sikhathi njengoba kuzophinde kumenywe nosopolitiki nezikhulu ukuba bayoziphendulela uma kunesidingo. UConrad Koch ongumlawuli walo popayi uzwakalise ukujabula ngalolu hlelo. Uthi okujabulisa kakhulu ngalo wukuthi luzokhonjiswa esiteshini esihamba phambili ngokukhiqiza izindaba ezisematheni ezinohlonze.
“Okunye okusijabulisayo wukuthi sizosebenza nethimba elinobuhlakani ekutholeni izindaba ezisezintsha ezifunwa ngabantu. Nemibuzo esizobe siyibuza akuyona ejwayelekile, ihlukile kakhulu, eminye izoshiya abantu bemangele,” kusho uKoch.
Umhleli omkhulu we-eNCA uMapi Mahlangu uthe uChester usekhombisile kule minyaka ukuthi udlala indima enkulu ekushintsheni indlela abantu ababuka ngayo ipolitiki eNingizimu Afrika.
“Okuthokozisayo wukuthi luza ngesikhathi lapho leli lizwe lizoba nokhetho lukazwelonke ngonyaka ozayo,” esho ephetha ngokuthi ngaphandle kwezindaba ezijulile luzophinde lube namahlaya azoshiya abantu kubuhlungu izisu.
Nemibuzo esizobe siyibuza akuyona ejwayelekile...