USHWI NOMTEKHALA BAZOCEBISA AMACIKO ESINTU
OMAKADEBONA bakamaskandi, uShwi noMtekhala, bazocebisa amaciko omculo wesintu asafufusa ngokubaluleka kokuhlonipha umculo nokungafaki amagama aqhathayo ezingomeni zawo.
Leli qembu elihlanganiswe nguMandla “Shwi” Xaba noZwelenduna “Mtekhala” Magubane, lizobe lethula ngokusemthethweni i-albhamu yalo entsha ethi, “Seludlulile” eSluma Park eSpruit, eGoli, ngoMgqibelo, okuyilapho bezokwethula khona izinkulumo ukuchushisa amaciko asevelela.
UMtekhala uthi ukuhlonipha kwabo umculo wabo kubenza bahlale bebukeka kahle eNingizimu Afrika. Uthi uma becula bafuna kungabikhona othunukala inxeba nozenyezayo ngokuthenga umsebenzi wabo.
“Namaciko asafikayo kubalulekile ukuba ayeke ukwenza umculo wethu uhlale waziwa ngokuthi ngowabantu abanempi.
“Lokho ayokwenza ngokuthi aqaphele into ayiculayo. Sizoluleka izinsizwa nezintombi ezisencane ukuthi ziwuhloniphe umculo wethu, kanjalo nabo laba asebevelele,” kusho uMtekhala.
Uthi kulo nyaka umcimbi bawususile ehostela eBuyafuthi ngoba le ndawo kayiphephile, kwazise nyakenye kusuke izidubedube kwabakhona abaqhumisa izibhamu.
Uthi kulo nyaka baziqinisile ezokuphepha ngoba umcimbi usunesasa elikhulu njengoba usuyithemba labaculi baseGauteng.
“Lo mcimbi siwenzela ukujabulisa abantu, kungenwa mahhala ngoba kasifuni kubekhona ozosala engajabuli noma engazitholi izinkulumo ezibalulekile,” kusho uMtekhala.
Kule ndumezulu yomcimbi kuzobe kushiyelana inkundla uJaivazimnike, u-Ali Mgube, uKhuzani, uMthandeni, uBobo, uDlubheke, uMroza, uThokozani Langa, iMfezemnyama, Amageza Amahle, Abafana bakaMgqumeni, uNjoko, uDumakahle, iNkosi yaMagcokama, uDulasi, Ubucwebe, uNgiga, uMabutho, uFalabo, Osolwazi, iNqanawe, iNdiya Elimhlophe nabanye kanti abaphathi behlelo uZimiphi “Zimdollar” Biyela woKhozi FM, Vusizwe Langa weJozi FM noBakhe Mchunu.