AMABHOKOBHOKO AFUNA UKUSONGA KAHLE UHAMBO LWASE-EUROPE
AMABHOKOBHOKO afuna ukuyisonga ngegiya eliphezulu imidlalo yobungani namazwe aphesheya kwezilwandle ephela ngempelasonto.
Lokhu kushiwo nguMzwandile Stick osethimbeni labaqeqeshi baleli qembu elizovala le midlalo ngokugadulisana neWales engagayelwa mphako kulezi zinsuku kweyeCastle Lager Outgoing Tour. Lo mdlalo ungoMgqibelo ngo17h00 ePrincipality Stadium, eCardiff.
Elakuleli liluvule kabi lolu chungechunge lwemidlalo liguqiswa yi-England ngo-12-11 eTwickenham, kodwa lakwazi ukuphendula amatafula liqumba phansi iFrance ngo-29-26 kanti ngeledlule libuye sekuvalwe amehlo lihlula iScotland ngo-26-20 ekuhambeni.
“Sifunde lukhulu kule midlalo esiyidlalile. Siqale izinto zingasi- hambeli kahle kodwa sakwazi ukuzijika. Indlela ebesidlala ngayo ngoNhlangulana (June) ihluke kakhulu kunesigijima ngayo manje.
"Ngingasho ngithi afezekile amaphupho ethu okunika abadlali ithuba lokudlala ndawonye isikhathi eside engikholwa wukuthi kuhambe kahle kakhulu.
"Kuningi okuhle esikuzuzile ngale midlalo esizokwakhela phezu kwakho njengoba silungiselela imidlalo yeNdebe yoMhlaba ezokuba seJapan ngonyaka ozayo,” kusho uStick. Nakuba ekhuluma kanjena lo mqeqeshi, uyazi ukuthi bazobhekana nomqansa wokubuya nomphumela omuhle kwiWales eshaya kwasani oluphambi kwayo.
Uma elakuleli lizimisele ngokubuya nomphumela omuhle kuzomele lidlale ngokuphindiwe kwazise sekunesikhathi lagcina ukuguqisa iWales.