IBHEKWE NGABOMVU I-SANI STAGGER
UBHEKWE ngabomvu umjaho iSani Stagger Marathon ozokuba ngoMgqibelo usukela eSani Pass uyojika emngceleni waseLesotho bese uphinda uyophelela eSani Pass.
Lo mjaho ungomunye wethandwa kakhulu ngabasubathi kwazise bawusebenzisela ukwenza izikhathi zokubamba iqhaza kwiComrades Marathon nakwiTwo Oceans Marathon.
UBongumusa Mthembu oyingqwele yeComrades Marathon yanonyaka, utshele ILANGA ukuthi uzokuba yingxenye yalo mjaho kwazise umsiza kakhulu uma ezilungiselela iComrades neTwo Oceans okuyimijaho emikhulukazi kwezokugijima eNingizimu Afrika.
“Lo mjaho ungomunye wengiyithandayo kwazise unezinselelo ezinzima kakhulu. Uyasiza uma ufuna ukuba yingxenye yeComrades neTwo Oceans. Ngonyaka ozayo mibili kuphela imijaho engizogxila kuyona, yiTwo Oceans neComrades,” kusho uMthembu onethemba lokuthi uzokwazi ukuvikela isicoco sakhe seComrades.
Abafuna ukuba yingxenye yalo mjaho bangaxhumana noMatt Goode kwethi: 072 907 3818.
AbaseBergville bazokhiphana inkani kwiJosiah Gumede Marathon ehambisana ne-21km ne10km ngoMgqibelo. Lo mjaho uzosukela eMazizini, eBergville, uphinde uphelele khona. Abafuna ukuba yingxenye yawo bangaxhumana noSipho Ndaba kwethi: 078 901 9997.
AbaseThekwini namaphethelo bazogadulisana kwi-Ethekwini Hope Challenge & Abstinence Half Marathon ehambisana ne10km ngeSonto ekuseni eCurries Fountain. Izingqwele kulo mjaho zizohlomula ngemiklomelo yemali nemithobanhliziyo yezikibha. Abafuna ulwazi ngalo mjaho bangashayela kwethi: 083 991 0441.