I-ASA imise isigungu esiphezulu seKZNA
Kungase kuchaphazeleke nabasubathi besifundazwe
LIBUKEKA limfiliba ikusasa labasubathi baKwaZuluNatal ngemuva kokuba i-Athletics South Africa (ASA), eholwa ngu-Aleck Skhosana onguMengameli, ibhalele sonke isigungu esiphezulu sesifundazwe izincwadi zokusimisa.
Izindaba zokuthi izomiswa iKwaZulu-Natal Athletics (KZNA), ziqale ukusabalala ngenyanga edlule ngesikhathi kunomhlangano we-ASA. I-ASA yacikwa wukungalubhadi kweKZNA kulo mhlangano. I-KZNA izidalele amazinyo abushelelezi ngokufaka i-ASA enkantolo mayelana nomjaho waseMgungundlovu.
YikwiCouncil Meeting ye-ASA lapho kwakhalwa ngokuthi iKZNA ikhombise ukwedelela kwazise okunye okwabe kuzokhulunywa ngakho (kulo mhlangano) kwakuthinta iKZNA. Ngemuva kwalo mhlangano, i-ASA yabhalela iKZNA incwadi iyinika izinsuku ezingu-30 ukuba ibeke izizathu zokuba ingamiswa.
ILANGA lithole ukuthi i-ASA ibhalele wonke amalungu eKZNA ngalinye incwadi, ewazisa ngokumiswa kwawo.
ULanga Mhlongo oyiSekela likaSello Mokoena onguMengameli weKZNA, ukuqinisekisile ukuthi uyitholile incwadi emumisayo, wayamukela. Uthi ezokugijima kufanele ziqhubeke. Omunye othe uyitholile incwadi nguCheryl Winn onguSihlalo weComrades Marathon Association (CMA) noSipho Mkhathini ongusihlalo weRoad Running. Nabo bathe bazamukelile.
UKhulezweni “Khura” Buthelezi noMoses Xulu abaphethe iTrack & Field neCross Country ngokwahlukana, bathe bamatasa nezivivinyo zokuphela konyaka, abazibonanga izincwadi ezibamisayo.
Ngemuva kokuba amalungu eKZNA ethole izincwadi zokuwamisa, kuthiwa uMokoena ubabele enkantolo eyophikisana nalokhu. Kuthiwa lolu daba luzongena namuhla ngoLwesine.
Leli phephandaba lithinta uGoodman Cele oyiMenenja yeKZNA, uvumile ukuthi izincwadi bazitholile ngoLwesihlanu. Uthi ngeke akwazi ukwenaba kakhulu ngalolu daba kwazise selusenkantolo. Uthi yinkantolo ezothatha isinqumo. Uqhube wathi isikhulu esiphezulu se-ASA, uRichard Stander, sifikile emahhovisi eKZNA ngoLwesibili emini. Akafunanga ukusho ukuthi lesi sikhulu besizokwenzani.
Leli phephandaba lithole ukuthi njengoba iKZNA lolu daba isilufake enkantalo nje, lokhu kungase kunike i-ASA ibhaxa lokumisa sonke isifundazwe okungenza ukuba yonke imijaho imiswe okungaholela ekutheni abagijimi besifundazwe bangakwazi ukubamba iqhaza emijahweni eyahlukene.
UDkt Simon Dlamini oke waba yisekela likamengameli kwi-ASA, uthe lolu daba kufanele lusukunyelwe ngokushesha ngoba luzo- phazamisa izinhlelo zabagijimi namakilabhu. Uthi kungaba yinto embi kakhulu uma kungagcina ngokuba iKZNA imiswe.
“Kunamakilabhu amaningi anemijaho yawo okumele igijinywe nonyaka.
"Le nto izowaphazamisa kakhulu kanti neComrades Marathon ingase ishayeke ngoba kasazi ukuthi le nto izophela nini,” kusho uDkt Dlamini.
Kuthiwa i-ASA ifuna ukufaka i-Administrator ewumumeli neAccountant njengoba ikholelwa ekutheni kunokuphathwa budedengu kwemali eKZNA.
USfiso Cele we-ASA, ukuqinisekisile ukuthi amalungu eKZNA abhalelwe izincwadi eziwamisayo.