Uqinisa idolo abalandeli beChiefs
UMphahlele unethemba lokuwuqala oweBucs
UCACISA ngokulimala kwakhe uRamahlwe “Rama” Mphahlele oyisitobha seKaizer Chiefs okunovalo ngaye ngaphambi komdlalo omqoka wale kilabhu ezobhekana ne-Orlando Pirates kwi-semi final yeTelkom Knockout ngoMgqibelo ngo-15h00 eMoses Mabhida Stadium, eThekwini.
Lo mdlalo ubhekwe ngabomvu njengoba uzoheha inqwaba yabalandeli kwazise amathikithi aphela esenamahora amabili nje kuphela kumenyezelwe ukuthi ayadayiswa. Nezokuphepha kubikwa ukuthi zizohlelwa ngokweqophelo eliphezulu yingakho kunxuswa abantu ukuba basheshe bafike enkundleni.
Nokho abalandeli beChiefs bashaywe wuvalo oluncane uMphahlele ephuma ngesiwombe sesibili emdlalweni weBafana Bafana neParaguay ophele zibambene ngo-1-1 koweNelson Mandela Challenge ngoLwesibili ebusuku eMoses Mabhida Stadium. Ukhishwe ngenxa yokulimala.
Lo mdlali osenakho ukushayela iChiefs amagoli amqoka, uqinise idolo abalandeli bezakhe njengoba ethi noma kanjani kuzofika usuku lwale ndumezulu yomdlalo esengumqemane.
“Bekuwukudonseka okuncane nje engikholwa wukuthi bekwenziwa wukuthi sengigijime imidlalo eminingi kakhulu. Kanginankinga manje, ngiyezwa ukuthi kuzofika usuku lwalo mdlalo sengiwulungele. Kuzokuba wumdlalo onzima kodwa emdlalweni womkhaya kwenzeka noma yini.
“Ngokwami izimfivilithi yiyona iPirates kodwa kulo mdlalo abantu mabalindele into ehlukile ngoba sizokuza siyihlomele nxa zonke. Sizokulwela ukunqoba lo mdlalo. Sizofela khona enkundleni,” kusho uMphahlele oshaye inguzunga yegoli iChiefs ikhipha iSuperSport United ngo-1-0 kwi-quarter final yalo mqhudelwano eThekwini.