OGQAME KWIDOWNS UZAMA INHLANHLA KUTHONGATHI
UZAMA inhlanhla kuThongathi FC uSiyabonga Ngubane ( osesithombeni) ozakhele udumo ebholeni lakuleli egijima kwiMamelodi Sundowns nakwamanye amakilabhu akwi-Absa Premiership.
UThongathi luzobhekana nomdlalo onzima weNational First Division (NFD) njengoba luzotholana phezulu neStellenbosch FC ngoMgqibelo ngo-15h30 ePrincess Magogo Stadium, KwaMashu.
Ngesikhathi leli phephandaba lisezinkundleni lapho kuziqeqesha khona uThongathi ngoLwesibili ekuseni khona oThongathi, lifice uSiyabonga (29) odlala emuva ehamba ngonyanyavu lwemoto yohlobo lweMercedes Benz. Lithole ukuthi lo mdlali ubenosuku efikile ezozama inhlanhla njengoba engenamsebenzi.
Lo mdlali ugcine ukuba nekilabhu ngomhla ka-1 kuNtulikazi (July) wango-2017 ngesikhathi iChippa United ingayivuseleli inkontileka yakhe. Omunye umdlali oficwe yileli phephandaba oThongathi nguThabiso Dlamini (26) oke walihlikihla esiswini kumaZulu FC.
Leli phephandaba lishayela uMakhosonke Mhlongo oyiMenenja yale kilabhu ngalolu daba, uthe: “Yiqiniso ukuthi laba badlali bakhona kodwa okwamanje kasikanqumi ngabo sisabahlola. Cishe ithimba labaqeqeshi lizocacisa ngabo lingakapheli leli sonto noma emuva komdlalo wethu neStellenbosch ozokuba ngoMgqibelo.”
Isiyonke imidlalo yeNFD engempelasonto ihlelwe kanje:NGOMGQIBELO EThohoyandou: Tshakhuma Tsha Madzivhandila vs Maccabi FC 15h00.
EBoland: Cape Umoya United vs Ubuntu Cape Town 15h30.
EPrincess Magogo: UThongathi FC vs Stellenbosch 15h30.
E-Athlone: Ajax Cape Town vs Royal Eagles 15h30.
Kanyamazane: Mbombela United vs TS Galaxy 15h30.
E-ABSA Tuks: Pretoria University FC vs TS Sporting 15h30. NGESONTO EMhlathuze Sports Complex: Richards Bay vs Witbank Spurs 15h30.
EVosloorus: Jomo Cosmos vs Real Kings 15h30.