Ushaya indesheni umqeqeshi weBafana
Ucela imidlalo eqinile ngaphambi koweLibya
USTUART Baxter ongumqeqeshi weBafana Bafana uzoshaya indesheni kwinhlangano eyengamele ibhola kuleli ngenhloso yokuba athole usizo ngaphambi komdlalo obucayi wezakhe neLibya wokuhlungela i-Africa Cup of Nations (Afcon) ozokuba ngoNdasa (March) wonyaka ozayo ekuhambeni.
IBafana ibambane neParaguay ngo-1-1 koweNelson Mandela Challenge ngoLwesibili kusihlwa eMoses Mabhida Stadium, eThekwini. IParaguay yiyona evule inkundla ngonyawo lukaFederico Santander, kodwa lacinywa ngelikaPercy Tau sekusele amanenjana ukuba umdlalo uphele.
IBafana igijima lo mdlalo nje, ngeledlule ibambane neNigeria ngo-1-1 kokagroup E wokuhlungela i-Afcon eFNB Stadium, eGoli.
Isisalelwe wumdlalo weLibya ozokuba ngomhla ka-22 kuNdasa wonyaka ozayo ekuhambeni. IBafana kufanele iwunqobe lo mdlalo ukuze izibeke ethubeni lokungena kule midlalo ye-Afcon ezokuba maphakathi nonyaka ozayo eCameroon.
UBaxter ekhuluma esigcawini sabezindaba emuva komdlalo weParaguay, uthe uzoshaya indesheni ezikhulwini zeSafa ukuze zimnike usizo.
“Le midlalo emibili esibe nayo inginike isithombe esehlukile ngabadlali bami, bangitshengisile ukuthi kabaliphonsi ithawula kalula, bayalwa. Kuyona yomibili le midlalo sikhave sihlulwa. Nokho into emqoka yilo mdlalo weLibya ozokuba ngonyaka ozayo.
“Cishe sisalelwe yizinyanga ezithathu ukuba sidlale nayo. Ngakho-ke kufanele kube nemidlalo esiyigijimayo yokuzivivinya. Ngisazofaka isicelo kubaphathi ukuba bangitholele imidlalo yesihle namazwe anamagalelo ukuze siye kwiLibya sizilungiselele ngokweqophelo eliphezulu. Singawunqoba lo mdlalo yinqobo nje uma sizodlala kahle,” kusho uBaxter.
Ephawula ngomdlalo weParaguay, uthi abadlali bakhe bafunde lukhulu kuwona.
“Ingichazile indlela iParaguay edlale ngayo. Isinike umdlalo oseqophelweni eliphezulu. Ngiyazi ukuthi ukuba sehluliwe abezindaba bebezongihlala entanyeni bangabe besayingena eyokuthi nginike abafana abaningi abasebancane ithuba kulo mdlalo.
"Bekuyindlela yokubaqinisa ukhakhayi lena ngoba kuningi okusafanele bakufunde,” kusho uBaxter.
UCarlos Osorio ololonga iParaguay, uthe bekufanele bawunqobe lo mdlalo.
“IBafana inabadlali abasheshayo ikakhulukazi unombolo-19 (Tau) uyingozi. Nokho ngikholwa wukuthi sikwazile ukumelana nayo. Bekufanele siwunqobe lo mdlalo. Sakhe amathuba amaningi kunayo kodwa kasaze sawasebenzisa. Lo mdlalo usisizile njengoba sizivivinyela imidlalo emqoka yeCopa America,” kusho u-Osorio.