ETHULA ABALOLONGI ABASHA AWEKZN MOTSEPE LEAGUE
UGCINE uqashe uKabelo “KB” Sibiya uMvoti FC ogijima kwiSouth African Football Association (Safa) KwaZuluNatal ABC Motsepe League.
Umsebenzi onzima obhekene noSibiya wukuzama ukungena kwi-last 32 yeNedbank Cup. UMvoti uzodlala ne-Orbit College ngoMgqibelo ekuhambeni ukukhipha ikilabhu ezodlala kwi-last 32 yeKe-yona.
UBonginhlanhla Gwala ongumnikazi woMvoti FC, utshele ILANGA ukuthi uSibiya umthole kuMavaravara FC okuyikilabhu egijima kwiSafa Eastern Cape ABC Motsepe League. Uthi uyakholelwa ekutheni isipiliyoni sakhe sizosiza le kilabhu kwazise phambilini ubeyibambe kwiBuya Msuthu nakwi-Orbit College ngokwahlukana.
“Ngikholwa wukuthi ngithole umqeqeshi ebengimdinga futhi ozokwazi ukusebenza kahle nabadlali. Uqale ukucija abadlali ngoLwesibili. Ngifuna ukuba azame ukufeza iphupho lami lokubuyela embangweni wesicoco kwazise iseyinde indlela. Uzosebenza ngokusizana noMlungisi Mthombeni obevele enza umsebenzi ofanayo futhi oqale isizini nekilabhu,” kusho uGwala.
Kwenzeka konke lokhu nje, uTom Mtambo olaxaze iDabeka Sporting ugcine eqome iRainham Sporting eholwa nguJulian Moodley. IRainham ilele endaweni yesithathu kwi- log yakulesi sigaba.
UMtambo uthe ukujoyina le kilabhu kufana nokubuyela ekhaya kwazise ubeyiqeqesha isagijima kwiSAB League, ingakakhushulelwa kwiMotsepe League.
“Okuhle ngeRainham wukuthi iseduzane nasekhaya okuzokwenza konke kube lula uma sengiphuma emsebenzini wami wesikole engisebenza kuwona ngokugcwele. Ngiyibukile indlela edlala ngayo. Ngizimisele ngokwenza izinguquko ezimbalwa. Ngidinga ikakhulukazi abadlali abaneminyaka engaphansi kuka-23 ubudala.
“Sivumelene nosihlalo wekilabhu ukuthi ngesizini ezayo ngizokube sengiqala amalungiselelo okunqoba lesi sigaba yize kungeke kube yinto elula,” kusho uMtambo. Ubuye wafisela konke okuhle u-Andile “Carol” Msomi osecija iDabeka kwazise bebesebenzisana kahle naye esaphethe.
Imidlalo yeMotsepe League:NGOMGQIBELO EMpumalanga: Dabeka Sporting vs Edendale Juventus 12h00.
EMkomaas Sports: X1 Experience vs Happy Wanderers 15h00.
EChatsworth: Summerfield Dynamos vs KwaDukuza United 15h00.
E-Eastbury: Rainham Sporting vs Ladysmith United 15h00. NGESONTO EChatsworth: Durban FC vs Ashley United 15h00.
EMzisho: Natal United vs Maritzburg City 15h00.