IChiefs iyagomela ngeTKO
Ithi ngeke iguqiswe yiPirates kabili enyangeni
ISHAYA phansi ngonyawo iKaizer Chiefs ukuphindwa ngesibhaxu yiOrlando Pirates kowenkomishi ekubeni isazama ukuzikhotha amanxeba okudliwa yilezi zimbangi zayo ezinkulu koweligi.
IChiefs iyiqale kabi inyanga kaLwezi (November) iguqiswa yiPirates ngo-2-1 kowe-Absa Premiership obuseFNB Stadium, eGoli, ngoMgqibelo womhla ka-3 kwephezulu.
Kungakapheli ngisho inyanga la makilabhu azophinde ahlangane njengoba eqhathwe kowandulela owamanqamu weTelkom Knockout ozokuba ngoMgqibelo ngo-15h00 eMoses Mabhida Stadium, eThekwini.
La makilabhu azokube engaqali ukubhekana kule nkundla eyakhelwe imidlalo yeNdebe yoMhlaba ebikuleli ngo2010.
Agcine ukushukana kuyona kowamanqamu weMTN8 owanqotshwa yiChiefs ngo-1-0 wegoli likaTefu Mashamaite ngoMandulo (September) wango-2014.
Yile nkomishi (MTN8) kwezemikhumulajezi eyagcina ukunqotshwa yiChiefs esiqede amasizini amathathu ingaqukuli lutho.
Yingalezi zizathu-ke uPhilani Zulu oyisitobha seChiefs elibeke ngesihloko elokuthi kungawa ilanga licoshwe yizinkukhu, iPirates ngeke ibavimbe endleleni yabo ebheke ekubuyiseni udumo lwale kilabhu, phambilini ebiyaziwa kakhulu ngokungazibheki izicoco.
“Sikuqonda kahle ukuthi lo mdlalo uzokuba nzima kakhulu. Nokho sizibophezele ngokulwela ukudlulela kowamanqamu.
"Ngeke sikuvumele ukudliwa yiPirates kabili esikhathini esifushane.
"Sidonswe ngendlebe ukuba siyihlasele zisuka nje iPirates, siyincishe umoya kodwa sizokube siyiqaphe nangelokhozi emuva.
"Okuhle wukuthi sesisiqonda kahle nesitayela esifunwa ngumqeqeshi wethu (uGiovanni Solinas),” kusho uZulu.
Uqhube ngokuthi ukuphela isidumo kwamathikithi alo mdlalo kubafake ugqozi nangaphezulu lokwenza kahle.
“Lokhu kukucacise ngokusobala ukuthi abalandeli bayilambele le mpinda.
"Phela bawumgogodla wekilabhu yingakho singafuni ukuphinda sibaphoxe,” kusho uZulu ogcizelele ukuthi kuvunguza umoya wobunye ejimini yezakhe njengoba bevivela eZimnyama.
Lo mdlalo uhambisana nenkulu ingcindezi ikakhulu kuSolinas kwazise ukuphindwa ngesibhaxu kungamdalela amazinyo abushelelezi kubalandeli okubacika kakhulu ukudliwa ngamaBhakabhaka.
Ozonqoba lo mdlalo uzodlulela kowamanqamu ozokuba mhla ka-8 kuZibandlela (December) eNelson Mandela Bay Stadium, e-Eastern Cape.