UPULE NEMFIHLO EMAKHELE UGAZI KWI-SOWETO DERBY
KUSANKENTEZA amazwi kaHappy Jele ongukaputeni we-Orlando Pirates kuVincent Pule oqiniswe idolo yilesi sitobha ngaphambi kweSoweto Derby yakhe yokuqala. UPule ujoyine iBucs ngasekuqaleni kwesizini esuka kwiBidvest Wits. Udlale owokuqala womkhaya, waphinda wahlohla negoli iBucs iguqisa iKaizer Chiefs ngo-2-1 koweligi ngasekuqaleni kwephezulu. Lo mdlali utshele ILANGA ukuthi uzizwa engcono kakhulu ngaphambi komdlalo wala makilabhu
ozokuba ngoMgqibelo ngo-15h00 eMoses Mabhida Stadium, eThekwini. La makilabhu azobhekana kowandulela owamanqamu weTelkom Knockout. “Ngaphambi kowomkhaya odlule ngangigxajelwa yisisu, kungalaleki, ngaze ngafonela uJele ngimazisa ngesimo engabe ngikusona. "Wangeluleka ukuba ngehlise umoya, egcizelela ukuthi kakumele ngicabange kakhulu ngalo mdlalo,” kusho uPule. Lo mdlali usephenduke intandokazi kubalandeli beZimnyama ngengcwenga yebhola ayigijimayo esimfake nakwiBafana Bafana. Uthi umdlalo wangoMgqibelo uzomfica kahle esenaso isipiliyoni sokudlala kowomkhaya. “Sizobhekana kahle impela neChiefs ngingasesabi. Okubalulekile wukuthi siyixine zisuka iChiefs. Sizolwela ukufa nokuphila ukuze sidlulele kowamanqamu. Kudala ikilabhu yagcina ukunqoba inkomishi. Sifuna ukujabulisa abalandeli bethu ngalena,” kusho uPule esekhempini yeBafana ebambane neParaguay ngo-1-1 koweNelson Mandela Challenge ngoLwesibili eThekwini. IPirates igcine ukuqukula inkomishi ngoNhlaba (May) wango-2014 ihlula iBidvest Wits ngo-3-1 kowamanqamu weNedbank Cup eMoses Mabhida Stadium. “Ngikuqonda kahle ukuthi umdlalo weligi nowomkhumulajezi kayifani neze. Nokho siyazi ukuthi iChiefs izokuza kithina ngenhloso yokubuyisa izinduku, isiphoxe phambi kwabalandeli bethu. Yingakho nje sizozibamba ziqine zisasuka. Kayikho into ezosijabulisa njengokufinyelela kowamanqamu sihlule iChiefs,” kusho uPule.