OWE-IDOLS AKAZIMISELE UKUSEBENZISA IMALI YAKHE
ISAHLALA ibuye izincinze izizwe ukuthi kayiphuphi yini intokazi esencane enqobe umncintisiwano womculo we-Idols SA ngeSonto kusihlwa. UYanga Sobetwa (17) ube yintandokazi kulo mncintiswano okhonjiswa kuMzansi Magic ophothulwe ngeSonto. Le ntokazi ngesikhathi ikhuluma neLANGA ithe kusazothatha isikhathi ukuba ikholwe ngokwenzeke empilweni yayo ngokuhlabana kwayo kulo mncintiswano. “Mhlawumbe kuyoze kubengcono uma sengibuyele ekhaya ngahlangana kahle nomndeni wami, bese kuqala kwehla kahle ukuthi yimina ngempela onqobile,” kusho uYanga waselokishini iDelft, eKapa. Uthi ubonga kakhulu uMdali ngoba ukuzethemba anakho kuqhamuka kuyena (uMdali). Utshele leli phephandaba ukuthi bekuhlale kuyiphupho lakhe ukungenela lo mncintiswano ngesikhathi esawubuka kumabonakude. “Okunginikeze ugqozi olukhulu wukubona uPaxton onebeminyaka elingana neyami enqoba ngonyaka owedlule. Yilapho ngibone khona ukuthi kungenzeka,” kusho le ntokazi ekhonze ukumamatheka uma ukhuluma nayo. Uthi ngaphambi kokungenela lo mncintiswano uyihlele kahle impilo yakhe. Uhlele ukuqhubeka nokufunda kwazise ubenza u-grade 11. “Ngiphoqeleke ukuba ngizimise izifundo zami ngoba ngifuna ukufeza leli phupho lami (lomculo). Kodwa nakanjani ngizobuyela (esikoleni) njengoba isifiso sami wukuba neziqu zobudokotela emculweni,” kusho yena ethi kodwa okwamanje usajahe ukubuyela ekhaya, kwazise sekunesikhathi agcina ukuchitha isikhathi nomndeni wakhe. Kumjabulise kakhulu ukwesekwa ngabazali bakhe uLinda no-Ayanda Sobetwa, futhi bekhombisa ukuziqhenya ngaye njengoba ubengenele lo mncintiswano. “Ayikho into ebingijabulisa njengokubona abazali bami njalo ngamaSonto bezongibuka ngicula, bekhombisa ukuziqhenya ngami. Lokhu bekwenza inhliziyo yami ithi kla. Ukwesekwa engikuthole emndenini wami kuyamangalisa,” kusho le ntokazi ezifela ngomculo wokholo. UYanga uthi uke wafikelwa wusizi ngesikhathi kumele acule ingoma kaWhitney Houston esihloko sithi "I Will Always Love You". “Obekungethusa wukuthi uWhitney ngumculi onekhono eliyisimanga. Izingoma zakhe zidinga ube nomonya, ngakho ngike ngafikelwa wukungazethembi. Lelo sonto kimina libe nzima kakhulu ngoba bengingazi ukuthi ngizokwazi yini ukugculisa amajaji nabantu abavotayo,” kusho uYanga othi uzwe kwehla umthwalo ngemuva kokuthola izincomo emajajini ngokucula kwakhe le ngoma.
UHLOBO LOMCULO AZOGXILA KUWO
Uthi ufisa ukugxila emculweni ozosondeza intsha kuNkulunkulu. “Umculo engizowenza nakuba kungeke kube yi-gospel le ejwayelekile kodwa uzokwakha futhi ube ngothandwa ngabantu abehlukene, ikakhulukazi labo abasebancane,” kuchaza yena. Emculweni unesifiso sokuhlanganyela ingoma nabaculi abala kubo uDr Tumi, Khaya Mthethwa, Dube Brothers, Benjamin Dube nabanye. Ukubeke kwacaca ukuthi nakuba esewunqobile lo mncintiswano kodwa akukho okuzomhlukanisa nezingoma zomculo wokholo, kwazise ungumntwana kaNkulunkulu. “Yingakho nasebandleni engikhonza kulona ngiyingxenye yekhwaya yalo. Njengoba senginqobe lo mncintiswano kuzoba nzima ukuba yingxenye yekhwaya kodwa okuzokwenzeka wukuthi ngizosiza lapho ngidingeka khona, kwesinye isikhathi ngicule,” esho. UYanga uthi uhlela ukwenza umcimbi omncane okwamanje elokishini iDelft lapho ezobiza khona abantu abasha abakhuthaze abasayinele nezikibha bese eyabaculela - uthi akukho okuzomhlukanisa nendawo adabuka kuyona. Mayelana nemiklomelo ayitholile, uthi okwamanje akazimisele ngokuyisebenzisa imali ayinqobile njengoba esafuna ukuyigcina aphile ngemali yokuqashwa ezindaweni ezahlukene. Uncome kakhulu abadidiyeli balo mncintiswano nalabo abencintisana nabo kwi- top 10 njengoba ebabaze ikhono labo. “Lo mncintiswano mkhulu kanti nabantu ebengiqhudelana nabo bebenekhono eliyisimanga yingakho bengibahlonipha kakhulu,” kusho uYanga othi nakuba abantu ebeqhudelana nabo benekhono kodwa ithemba ubehlale enalo. Phakathi kwemiklomelo uYanga ahlabane ngayo kubalwa isamba semali elinganiselwa ku-R1 million, imoto yohlobo lweFord Fiesta Eco Boost elinganiselwa uR298 000, izinsimbi zomculo zakwaYamaha ezingabiza uR80 000, nevoucher yezimpahla zokugqoka yemali engu-R100 000. Uphethe ngokuthi useqalile ukuzibhalela izingoma futhi uzimisele ukufunda ukudlala izinsimbi ezahlukene emculweni.