Bashaywe baklinywa ngojeke wemoto
Bebesolwa ngokweba izimbuzi
BASELE nezibazi ezinhliziyweni abesilisa abathathu baseWasbank abathi bayosikholwa befile isihluku esenziwe ngumnikazi wepulazi abahlala kulona njengoba bethi ubathengele abantu ukuba babashaye ngoba besolwa ngokweba izimbuzi.
UMnu Bonginkosi Ziqubu (49), uMnu Thabani Ziqubu (24) noMnu Khetha Ziqubu (17) okumanje sebemvulele icala lo mlimi - ILANGA elinalo igama lakhe - bathi lezi zimbuzi obekuthiwa bazebile, zigcine sezitholwa kwabanye abafana abangabazi, ekubeni bona bese beshaywe bacishe bafa, baklinywa nangojeke wokukhipha amasondo ezimoto.
Elandisa ILANGA uMnu Ziqubu (Bonginkosi) - onguyise omncane kaThabani noKhetha, uthi umlimi ongumnikazi wepulazi endaweni, ufike emzini wakubo nohlu olunegama likaThabani nelikaKhetha ethi ucela baye epulazini lakhe kunodaba oluyokhulunywa.
“Izingane zingicele ukuba ngiziphelezele njengoba kuyimi omdala wesilisa okhona ekhaya, oyise besebenza kude. Sifike epulazini zabuzwa ngezimbuzi ezebiwe.
"Bese kukhona amadoda abalelwa ku-15 esingawazi nje endaweni, okuthiwa abizwe nguyena lo mlimi ukuba azobona izingane zethu ezingamasela. Lukhulunyiwe udaba kwacaca ukuthi laba bafana kabathinteki.
"Bagitsheliswe emotweni kwathiwa kuhanjwa nabo, ngabuza ukuthi bayiswa kuphi, kwangacaciswa.
"Ngithe nami ngiyahamba, ngeke ngivume kuthathwe izingane phambi kwami ziyiswe lapho engingazi khona, ngingazi nokuthi zizofike zenziweni,” kuchaza uMnu Ziqubu.
Uthi bahambile nala madoda abangawazi belayishwe evenini lakhe umlimi, badlula kwenye indawo kwathathwa omunye umfana abangamazi, baqhubeka baze bayofika ehlathini. Yilaphoke la madoda eqale abashaya ebabuza ngalezi zimbuzi.
"Abashaye kwagcina kungasavumi ukuba ngithule, nami bangithelekela, bathatha ujeke wemoto besiklinywa ngawo.
"Lo mfana abamthathe endleleni, ugcine evumile ukuthi zikhona izimbuzi azithathile nabanye abafana. Laba bami kabathinteki nakancane kulolu daba.
"Basilayishe emotweni sonke sabuyela epulazini. Bafike bamtshela (umlimi) ukuthi laba bafana bami kabathinteki ekuntshontshweni kwezimbuzi.
"Umlimi kunokuba axolise, uvele wathi masidedelwe uma singathinteki.
"Sibe sesimvulela icala lokusithengela abantu ukuba basishaye," kusho uMnu Ziqubu. Okhulumela amaphoyisa KwaZulu-Natal, uCapt Nqobile Gwala, ukuqinisekisile ukuvulelwa kwalo mlimi icala lokushaya. Uthi amaphoyisa asaluphenya udaba, akekho osaboshiwe.