Uyohlolwa ingqondo umfundisi
Usolwa ngokudlwengula ingane ena-7
KUHLEHLE icala ukuze ayohlolwa ingqondo umfundisi wePentecostal Church of Christ, eDukuduku, eMtubatuba, osolwa ngokudlwengula intombazanyana (7).
Lo mfundisi (esingeke silidalule igama lakhe ngenxa yokuthi akakasho ukuthi uyalivuma noma uyaliphika icala) ubevele ngoLwesihlanu eNkantolo yeMantshi yaseMtubatuba eyofaka isicelo sebheyili, nokho usazoqhubeka nokuhlala esitokisini.
Kuzokhumbuleka ukuthi emasontweni amabili adlule ILANGA libike kabanzi ngalolu daba, lapho kuvele ukuthi icala lalo mfundisi liyahlehliswa ngoba kunolunye uphenyo okusafanele lwenziwe.
Isiphakamiso sokuba ayohlolwa ingqondo samukelwe ngezandla ezimhlophe ngummeli wakhe, u-Adv Thulani Madela.
Lokho kwenze ukuba imantshi, uMnu Barden Horsp, ilihlehlise leli cala.
“Ngesizathu sokuthi kukhona okungabonakali kahle ngomsolwa, kusafanele kulindwe imiphumela yokuhlolwa kwengqondo yakhe,” kusho imantshi.
Amalungu omndeni abekhona enkantolo esekwe ngamalungu e-IFP. Lo mfundisi usolwa ngoku- dlwengula le ngane esebenzisa ithuba lokuba ngumalume oyihambisa aphinde ayilande esikoleni.
Umndeni wesisulu uthi ufisa kuphume isigwebo esizothumela umyalezo nakwabanye omalume abathutha izingane zesikole.
“Sikhathazekile ngalesi sigame- ko. Ingane ifike ekhaya isolisa, okuthe uma sibheka sathola ukuthi igilwe umkhuba. Sibize omama abahlola izintombi ukuba bazosi- bhekisa, ingane ichaze konke, yaveza ukuthi ubengaqali ukuyigila lo mkhuba, bese kungokwesithathu. Ithe ubeke ayivimbe ukuba iye esikoleni, elokhu ehlola ukuthi kasiphumile yini isikole. Ithe ubeyidlwengula maqede ayincenge ukuba ingaluvezi lolu daba, ayivale ngamaswidi nama- snack,” kusho omunye wabazali bengane.
Abe-IFP bebecula izingoma ezigadla kumsolwa bezisheba neziqubulo ngaphandle kwenkantolo.
Abenxusa inkantolo ukuba ingamdedeli umsolwa, esho nokusho ukuthi uyazigulisa, uzenza ongaphilile ekhanda.
“Silapha ukuzokweseka umndeni. Sidinwe nawukuthi kunabathile esinabo kwezombusazwe abacele umndeni ukuba wesule icala, wamukele inhlawulo. Sifuna ukukusho ukuthi kasihambisani nokudlwengulwa kwabantu maqede kube nabathi makukhokhelwane njengoba nje kuvela ukuthi umsolwa ubengalifaki nejazi, emosha ikusasa lengane. Sizonxusa ukuba kuthathwe izinyathelo ezifanele,” kusho uMnu Thulani Gumede oyilungu le-IFP.
Lolu daba luzobuyela kule nkantolo mhla ka-13 kuZibandlela (December), okuwusuku okuzobe sekufundwa ngalo imiphumela kadokotela ohlola isimo somqondo somfundisi.