UMHLABUYALINGANA UZIMATUZELE IZINDONDO
KUVELE ukuthi usizwe wukusebenzisana namakhosi uMasipala waKwaMhlabuyalingana owole izindondo ngoLwesine, eThekwini, njengoba bekuklonyeliswa omasipala abenza kahle KwaZulu-Natal.
Lo masipala ukhale wemuka nezindondo ezine, okubalwa eyokuhambisa ngendlela intuthuko edidiyelwe, umbiko ongenagcobho ngokusetshenziswa kwemali yabakhokhi bentela nezinhlelo zawo zokubuyisela umphakathi ezimpandeni zokuba ngabantu.
Imeya yalo masipala, uMnu Nkululeko Mthethwa, ithi kubasebenzele kakhulu ukuba nemihlangano yamakhansela namakhosi amane; okuyiNkosi Ndabezinhle Zikhali, iNkosi Khulezweni Nxumalo, iNkosi Sizabantu Gumede KwaMashabane neNkosi Mabhudu Tembe.
“Amakhosi siwasondezile ngoba sikholelwa kakhulu kuwona. Sihlala phansi sibonisane nawo emihlanganweni yamakhansela. Konke esikwenzayo kusuke kuyizinqumo esizithathe sonke emhlanganweni wokubonisa ngezinhlelo zentuthuko esisuke sizokuba nazo kuwona wonke amawa- di ethu,” kusho uMnu Mthethwa.
Uthi imfihlo yabo enkulu yokuqoqa lezi zindondo, wukuthi umasipala wabo uhlale useduzane nabantu okuyibona abazisholo ngokwabo abakudingayo.
Utshele ILANGA ukuthi bayacophelela kakhulu uma besebenzisa imali yabakhokhi bentela ukuze umphakathi uhlale ujabule.
“Lokhu esihlonishwe ngakho kuyasikhuthaza kakhulu ngoba izindawo zasemakhaya akujwayelekile ukuba zihlomule, kuhlale kukhalwa ngazo kwezentuthuko. Sesithole ugqozi lokusebenza kakhulu siphinde siqhamuke nezinhlelo ezintsha ezizothakaselwa wumphakathi wethu,” kusho uMnu Mthethwa.
UNgqongqoshe wezokuBusa ngokuBambisana nezoMdabu KwaZuluNatal, uNkk Nomusa Dube-Ncube, ubonge bonke omasipala abakhathalele inhlalakahle yemiphakathi.
Abanye omasipala abancane abahlomule ngokuphatha kahle imali uMzumbe, uKhahlamba, uMhlathuze neRay Nkonyeni kanti kwabahlomule emkhakheni wokusebenza kahle wuMasipala wesiFunda iLembe, uMhlathuze noMhlabuyalingana.