Umdonsiswano esikoleni esisolwa ngokukopela
Kubangwa eyokulandwa kwezitifiketi
IYASHAYISANA imibono ngokudedelwa kwezitifiketi zabafundi abebenza umatikuletsheni eMashiyamahle High School, eNdwedwe ngo-2014, okubanjwe imiphumela yabo ngenxa yokuthi bebesolwa ngokukopela.
Okudala lokhu wukuthi uMnyango wezeMfundo KwaZulu-Natal usuveze ukuthi seziphumile izitifiketi, mazilandwe ngaphansi kwehhovisi lawo lesifunda iLembe kanti isigungu esilawula isikole eMashiyamahle, sithi sisola itulo emnyangweni lokuzama ukumukelisa abafundi ngenkani imiphumela echithwe mhla ka-31 kuNcwaba (August).
NgoNcwaba abafundi bavuke indlobane, basho ukuqeda izikhulu zomnyango nenhloko yawo, uDkt Enoch Nzama, ngesikhathi behambise imiphumela kulesi sikole.
Obekubacasula wukuthi uDkt Nzama ubehambise imiphumela yezifundo obekuthiwe abafundi mabaziqale phansi ngoba besolwa ngokuthi bazikopelile. Bona bebethi bafuna imiphumela yango2014, babone ukuthi batholeni isifundo nesifundo.
Ngokuthola kweLANGA, ngokwesivumelwano somnyango wezemfundo nommeli wabafundi, uMnu Themba Mjoli, bekuthiwe makubuyiswe imiphumela yango2014 njengoba injalo, ingahlanganisiwe nezichibiyelo ezibhalwe ngo-2015. Lokho kuthiwa akwenzekanga ngesikhathi uDkt Nzama ehambisa imiphumela ngoNcwaba.
Ilungu lesigungu esilawula isikole, uMnu Nkosimayithanda Zulu, uthe ngeke abafundi bayilande imiphumela kwiLembe. “Umnyango kumele uzilethe wona izitifiketi esikoleni njengoba kwenzeka nakwezinye izikole. Kasikaze sizwe kuthiwa imiphu- mela isilandwa esifundeni.
“Sekuqale nini lokho? Ngabe yini inhloso yakho? Bafuna ukwe- nza ubuqili! Bona mabahlangane nommeli wabafundi ahlole kuqala (imiphumela) ukuthi yikhona yini lokhu okulindelwe abafundi ngaphambi kokuba yemukelwe, hhayi ukuthi kubizelwe izingane emakhoneni,” kusho uMnu Zulu.
Okhulumela uMnyango wezeMfundo KwaZulu-Natal, uMnu Kwazi Mthethwa, uthe abafundi mabalande imiphumela yabo, uma bengenelisekile banelungelo lokuphikisana nayo.
“Akukho esizokuchaza kakhulu ngalolu daba ngoba luthinta abameli,” kusho uMnu Mthethwa. Ebuzwa ukuthi kubuyiswe imiphumela yango-2014 noma sekufakwe nezichibiyelo kuyona, uthe lokho kuphakathi kwabo nabafundi.
“Kunabantu abangafuni izingane ziqhubekele phambili nempilo, ngeke sifunze umuntu into angayifuni. Abafundi sicela bayolanda imiphumela yabo,” kusho uMnu Mthethwa.
UMnu Mjoli uthe akanalo ilungelo lokuxoxa ngodaba lwamakilayenti yakhe. Kwenzeka konke lokhu nje, abafundi baseMashiyamahle basolwe ngokukopela izifundo okubalwa kuzona iMaths, iSayensi neLife Sciences.
Phambilini okhulumela uMnyango wezeMfundo eyisiSekelo, uMnu Elijah Mhlanga, utshele ILANGA ukuthi okwenze kunuke santungwana, wukuthi abafundi abasolwe ngokukopela bebebhala isibalo ngendlela ephambene kodwa ekugcineni bathole impendulo okuyiyona. Bekuthi noma benze iphutha balenze ngokufana, balixikize bonke.