UCELE IMPINDA EBANJWA INKUNZI LIBALELE
LICELE impinda ibhokisa elikhale ngokubanjwa inkunzi kwaze kwaba yikabili empini eshiye abaningi bekhexe imilomo ngoMgqibelo ebusuku eStaples Center.
UDeontay Wilder usivikele ngempumelelo isicoco sakhe seWBC heavyweight empini ephele ngokulingana ingekho efuna ukugoba uphondo phakathi kwakhe noTyson Fury. Izinqumo zamajaji zisuse umsindo omkhulu kule mpi yalaba osondonzima ebinezigameko eziningi ezishiye abantu bebambe ongezansi.
UWilder uthe: “Ngenze konke okusemandleni ami ukunqoba le mpi futhi ngikholwa wukuthi ngiyinqobile. Akekho ongabonanga ukuthi uFury ngimwise kabili. Kangazi ukuthi amajaji abone kanjani kodwa kulungile, uma kunje kayikho into umuntu angayenza. Ngicela sibuyele eringini ukuze kubonakale ukuthi ngubani inkunzi,” kusho uWilder.
Nokho likhuluma kanjena kufanele leli bhokisa eselinqobe izimpi ezingu-49 lingahlulwa kwazise kucacele ngisho ingane encane ukuthi libanjwe inkunzi. UWilder ugingqe uFury ngomzuliswano ka-9 ethumela isibhakela esiqhwiza umentshisi wabuye wamphinda nangowokugcina.
UFury uphendule wathi: “Ngikholwa wukuthi yimina onqobile kule mpi, ukuthi ungivuse kabili othulini kakusho lutho. Uma kuwukuthi ubethumela izibhakela eziqinile bengingeke ngivuke. Umhlaba ubonile ukuthi yimina onqobile. Njengoba ethi ufuna impinda uzoyithola, kangimesabi.”
ULennox Lewis ephawula ngalo mphumela, uthe kumshaqisile akubone kule mpi kwe- draw engekho.
Amajaji athe umphumela uhambe kanje, 115-111 eyinika uWilder elesibili lathi u-114-112 liyinika uFury elesithathu lathi u-113-113.