SEYIZOTHAKWA NGEZAMABHOKISA AKHOKHELWAYO EKA-TAP TAP
SEWUZOTHAKWA ngezimpi zesibhakela esikhokhelayo umqhudelwano wokuhlonipha u-Elijah “Tap Tap” Makhathini ongomunye wezingwazi ezihlonishwayo esibhakeleni saseNingizimu Afrika.
UMakhathini ubehlelelwe izimpi zokubungaza iqhaza lakhe kulo mdlalo ngoMgqibelo eMfolozi TVET College, eShowe. Lezi zimpi bekungezama-amesha kuphela. UCebisa Xulu weTap Tap Boxing Academy, uthe kusukela ngonyaka ozayo lezi zimpi zizohlanganisa nezesigaba esikhokhelayo.
“Sijabule kakhulu ngokuphumelela komcimbi wokuhlonipha uTap Tap.
"Kunenqwaba yamabhokisa abeyingxenye yalezi zimpi asezokulwa esigabeni esikhokhelayo. Ngakho-ke kumqoka ukuba singawalahli, kodwa aqhubeke nokuba yingxenye yalezi zimpi.
"Lesi sikhungo sisisungulele khona ukukhiqiza amabhokisa azohamba ezinyathelweni zikaTap Tap. Ukufakwa kwezimpi zesigaba esikhokhelayo kuzosisiza ukugwe- ma ukufudukela kwezinye izifundazwe kwamabhokisa ethu,” kusho uXulu obonge kakhulu umasipala waseMlalazi, umnyango wezemidlalo waKwaZulu-Natal nabeOrange Groove abebeseke lezi zimpi.
* Sisekuzo ezesibhakela samaamesha, iKwaZulu-Natal izomelwa ngamabhokisa amabili kuphela emidlalweni ye-African Union Sports Council (AUSC) Region 5 eqala mhla ka-7 isongwe mhla ka-14 kwephezulu eBotswana.
ULwazi Ngiba waseThekwini noSakhile Hlatshwayo waseMzinyathi, yibona abamele lesi sifundazwe ethimbeni likazwelonke lesibhakela.
Ithimba lakuleli licijwa nguNkosinathi Thusi waseMzinyathi. USandile Sibisi onguMengameli weKwaZulu-Natal Olympic Style Boxing Organisation, uthi bebefisa sande isibalo samabhokisa abo kule midlalo, kodwa kwathathwa amabili kuphela.
Uthi unethemba lokuthi azokwenza kahle ukuze azicabele indlela ebheke kuma-Olympic Games azokuba ngo-2020 eTokyo, eJapan.