Baqiniswe idolo ngeyowodumo kwiBucs
Bese kunovalo ngemidlalo kaNsimbi Sangweni
PHANSI amaphaphu kubantu baseDondotha njengoba bese kusabalele imibiko yokuthi bazophucwa imidlalo kaSiyabonga “Nsimbi” Sangweni obeyisiqongqwane seOrlando Pirates neBafana Bafana.
Le midlalo esihlelwa minyaka yonke, bese kuthiwa izothuthelwa eMawombe Sports Complex okuyinkundla ezomumatha izinhlobo ezahlukene zemidlalo.
USmanga Mgenge oyiMeya yaseMfolozi, uthe akukho okuzosusa imidlalo kaNsimbi eDondotha.
Uthi kumanje bamatasa nosomabhizinisi bendawo ukuqinisekisa ukuthi bayahlomula ngokuhlelwa kwemidlalo kaSangweni.
USangweni usize iPirates inqoba izindebe ezintathu ngesizini eyodwa, futhi ubambe elikhulu iqhaza le kilabhu ifinyelela kowamanqamu weCaf Champions League nakowamanqamu weCaf Confederation Cup.
USangweni ubeyingxenye yeBafana egijime kwiFifa Confederations Cup nakwiNdebe yoMhlaba okuyimiqhudelwano ebikuleli ngo-2009 nango-2010.
Uphinde waba yingxenye yeBafana ebibambe iqhaza kwiAfrica Cup of Nations (Afcon) ebikuleli ngo-2013 lapho eshaye khona amagoli amqoka.
Kuthiwa miningi imidlalo ezosingathwa eMawombe kubalwa eyeSouth African Football Association (Safa) KwaZulu-Natal ABC Motsepe League neyeSAB League.
“Le nkundla bekumele idluliselwe emphakathini ungakapheli lo nyaka, nokho okungeke kusenzeka.
"Lokhu kudalwe wukuthi ngeke isafakwa utshani obudinga ukuchelelwa, kodwa sekuzosetshenziswa obokufakelwa ukuze kongiwe amanzi.
"INike Centre eseSoweto isihlale isikhathi eside notshani bokufakelwa.
"Nathi sibone kungcono ukuba sisebenzise bona,” kusho uMgenge ophinde abe ngunobhala weSouth African Schools Football Association (Sasfa) KwaZuluNatal, futhi oyilungu lesigungu sikazwelonke sale nhlangano eholwa nguMandla “Shoes" Mazibuko.
Nokho-ke ubuholi bukaMazibuko sebuphelelwe yisikhathi njengoba bekumele kukhethwe obusha ungakapheli lo nyaka, okuyinto engakenzeki.