IBUYISELWE NGO-ELETHU INGWEVU
UBUYISELWE ngo- "elethu” uCheryl Winn esikhundleni sakhe sokuba nguSihlalo weComrades Marathon Association (CMA) emhlanganweni wale nhlangano wonyaka obungeledlule eMgungundlovu.
Isekela likaCheryl kube nguSfiso Nzuza. Ukhetho lweCMA beluphethwe yi-Independent Electoral Commission of South Africa (IEC).
Ukuqokwa kukaCheryl kushayelwe elikhulu ihlombe ngabathandi bezokugijima abaningi kwazise uthathwa njengomunye wabantu abanolwazi olunzulu kwezokuphatha.
Abanye abaqokiwe nguMqondisi Ngcobo, uCeli Makhoba, uLinda Hlongwa-Madlala noSteve Mkasi kanti abebevele bekhona abasazoqhubeka babe esigungwini sale nhlangano nguCheryl, uZinhle Sokhela, u-Isaac Ngwenya noAndrian Stowell.
UCheryl ubabongele bonke abaqokiwe waphinde wamukela uLinda wabe esefisela uNeville Thomas noMorgan Pillay konke okuhle njengoba bengakwazanga ukubuyela ezikhundleni zabo.
IComrades yangonyaka ozayo izokuba mhla ka-9 kuNhlangulana (June) isukela eThekwini isongwe eMgungundlovu.
Umjaho wanonyaka ungene emabhukwini omlando kwezemidlalo njengoba kuthathe izinsuku ezingaphansi kweziyisikhombisa ukuba kutholakale isibalo sabasubathi abangu-25 000 abazobamba iqhaza kuwo.
Kusenjalo, uXolani Mabhida ongumqeqeshi kaBongumusa Mthembu oyingqwele yeComrades Marathon yanonyaka, uhlele iTraining Camp ezoqala mhla ka-17 isongwe mhla ka-30 kwephezulu eDurban University of Technology (DUT) e-Indumiso Campus.
Abasubathi bazokube becijwa kusuka kwi- track kuya kwi-Ultra Marathon kanti imali yokubhalisa ngu-R650. Le mali ihlanganisa indawo yokulala, ukuziqeqesha nemali yokuthutha labo abazokuba yingxenye yeBongumusa Mthembu Training Run ezokuba mhla ka-29 isukela eMpendle isongwe eBulwer.
Abagijimi bayacelwa ukuba baziphathele imibhede. Abafuna ukuba yingxenye yale training run bangashayela uMabhida kwethi: 079 806 7205.