AKENEME UMQEQESHI WE-PIRATES NGOKULAHLA AMAPHUZU

UZWAKALISE ukungenami uMilutin “Micho” Sredojevic ongumqeqeshi we-Orlando Pirates ezakhe zibambana neMaritzburg United ngo-0-0 kowe-Absa Premiership ngoMgqibelo ebusuku e-Orlando Stadium, eSoweto.

IBucs iye kulo mdlalo kubhekwe ukuba izidlulele kalula kwazise yiyona esefomini uma iqhathaniswa neTeam of Choice. Nokho kakuhambanga kanjalo njengoba igcine ngokuthola iphuzu. Lokhu kwenze uSredojevic wazwakalisa ukungenami ngezakhe ngokulahla amaphuzu.

“Kayikho into engicasula njen- gokulahla amaphuzu emdlalweni onjengalona, obekufanele ukuba siwunqobe ngoba ekugcineni sizowakhalela. Sizibekele umgomo wokuthi sifuna ukushaya kwasani ekhaya kodwa sizodedela umdlalo ngalolu hlobo. Sakhe inqwaba yamathuba kodwa sangawasebenzisa.

“Into esibulalayo wukuthi ngelinye ilanga siyashisa ngelinye siyabanda. Kuzofanele siyilungise le nto uma kuwukuthi sifuna ukunqoba isicoco seligi. Ngeke uyinqobe iligi uma usahlulwa yimidlalo enjena. Kakusikho ngoba ngiyibukela phansi iMaritzburg, nayo izitholile ezayo iziwombe ezethusayo kodwa umdlalo bekun- gowethu bekufanele siwunqobe,” kusho uSredojevic.

UFadlu Davids ololonga iMaritzburg, ufanise lo mdlalo nowechess.

“Besithi uma senza umnyakazo, benze emibili kodwa silwe kulobo bumnyama. Bekungathi wumdlalo we-chess, bekusebenza amasu kakhulu. Indlela abebesicindezele ngayo besiphoqeleka ukuba siyonqwabelana emngceleni wethu. Kodwa-ke ngijabule ngephuzu lizowenza umehluko kubadlali bethu. Ukubambana nePirates kakusiyona into encane ikakhulukazi njengoba isidedela kanjena nje isibhaxu,” kusho uDavids.