INTOKOZO KWABOSUTHU KUGIDA IDLOZI

KULINDELEKE ukuba aqhubeke nokuqoqa amaphuzu amathathu AmaZulu FC asanda kujabulisa abalandeli enqoba imidlalo emibili ilandelana ekuhambeni.

UCavin Johnson ocija uSuthu, usanda kudalula ukuthi ufuna kuyiwe emaholidini kakhisimusi bebalwa namakilabhu akwi- top 8. Le kilabhu iphucwe yiFifa amaphuzu angu-6, okwenze yahlala emsileni welog ye-Absa Premiership. Ukunqoba imidlalo emibili yakamuva, kuyenze yaxaxama emsileni.

AmaZulu azokuba nemidlalo emibili ekhaya ngaphambi kokusongwa kwalo nyaka. Azodudulana neBloemfontein Celtic ngoLwesithathu oluzayo lomhla ka-12 kwephezulu ngo-19h30 eKing Zwelithini Stadium, eMlazi. USuthu luzovala unyaka ngomdlalo womkhaya neLamontville Golden Arrows mhla ka-22 kwephezulu ngo-15h30 kuyona le nkundla.

Ngaphambi kokubhekana ne- Arrows, uSuthu luzovakashela iBlack Leopards ngoMgqibelo womhla ka-15 kwephezulu eThohoyandou Stadium, eLimpopo.

Le kilabhu ihlule iHighlands Park ngo-2-1 phakathi nesonto ekuhambeni. Kayibuyelanga eThekwini njengoba ngoLwesihlanu ibiqhathwe neChippa United emdlalweni ewunqobe ngo-1-0.

USuthu yilona oluqhathe u-Eric Tinkler nolaka lukaSiviwe “Chippa” Mpengesi ongumnikazi weChippa. UMpengesi usezakhele udumo ngokungacabangi kaningi ukuxosha abaqeqeshi abangamkhiqizeli imiphumela emihle.

Imiphumela yemidlalo yeMDC ngempelasonto ihambe kanje: Arrows Reserves 2, Cape Town City Reserves 1; SuperSport Reserves 1, Chippa Reserves 0; Highlands Reserves 0, Free State Stars Reserves 1; Sundowns Reserves 2, Chiefs Reserves 1; PMB United Reserves 3, Baroka Reserves 2; Polokwane Reserves 1, AmaZulu Reserves 0; Leopards Reserves 1, Celtic Reserves 3; Wits Reserves 2, Pirates Reserves 0.