Owe-Arrows ubona iChiefs ingasenasithunzi
Siya ngokuzaca isisu saBafana Bes'thende
UMQEQESHI weLamontville Golden Arrows, uClinton Larsen, uyibona ingasenasithunzi iKaizer Chiefs ethathwa njengenye yamakilabhu amakhulu kuleli naseAfrika.
IChiefs iguqiswe yi-Arrows ngo2-1 kowe-Absa Premiership ngoMgqibelo kusihlwa ePrincess Magogo Stadium, KwaMashu. Amagoli okunqobe ngawo Abafana Bes’thende abekwe enethini nguLimbikani Mzava obekungamaphenathi, kwathi eleChiefs lona lashaywa nguLeonardo Castro.
La makilabhu aye kulo mdlalo ebhekene nengcindezi njengoba imiphumela ibiwaphika. ULarsen uthi akayiboni isanesithunzi njengakuqala iChiefs.
“Isimo sebhola sishintshile manje, sizama ngawo wonke amandla ukuthi sikufake emiqondweni yabadlali bethu ukuthi amabheji ala makilabhu okuthiwa makhulu kawasafani nakuqala.
"IChiefs nje yona yehlelwe yisithunzi, kakusafani nangama-80’s nangama-90’s lapho ebisatshwa khona.
“Kodwa-ke ngifuna ukubongela abadlali bami, benze konke ebesikuhlelile. Uma ungumqeqeshi kuyakuthokozisa ukubona isu lakho lihamba ngendlela. Ngijabule ngalo mphumela, wenze sabuyelwa wukuzethemba,” kusho uLarsen.
Lo mqeqeshi ukhalile ngesimo senkundla, wathi senze kwaba nzima ezimbangini zabo ngisho nakubona imbala.
“Kusisebenzele thina kancane ukubheda kwenkundla ngoba besisazi isimo sayo. Kodwa kuyingozi ukudlala endaweni enezindawo eziqinile ingakulimazela abadlali. Kuzofanele siyobasebenza abadlali bethu ngoba inkundla uma iqinile ilimaza amajoyinti,” kusho uLarsen.
Uthi bazodonsa kanzima njengoba uMusa Bilankulu odlala esiswini ekhishwe ngekhadi elibomvu kulo mdlalo. Uthi njengoba bevele belinyalelwe nguDanny Phiri noSandile Zuke nje, kubenza bazace enkabeni yesisu.