KUSOLWA INGCINDEZI KOTHOLWE ELENGA
KUSOLWA ukuthi ubegajwe yingcindezi yemali owesilisa waKwaMbotho, eHarding, obeyiphoyisa, oqome ukuthatha intambo wazilengisa endlini yangasese emzini wakhe ngoMsombuluko.
UMnu Mafu Cebisa (56), osule emsebenzini ngo-2016, kusolwa ukuthi uzibulale ngoba ubesehluleka wukuphila impilo ephezulu abeyiphila nomndeni wakhe, bengaludli olubabayo, emuva kokuphuma kwemali yasemsebenzini ngonyaka odlule.
Ngokuthola kweLANGA ngosondelene naye, ocele ukuba igama lakhe siligodle, izinto zithe sezithanda ukubheda imali isiphelile, umkakhe wamdivosa, wahamba nezingane, wamshiya nehholo lomuzi.
“Le nto ibimudla uMnu Cebisa kangangokuba ubesebonakala ngisho ehamba nje ukuthi lukhulu olumudla ngaphakathi. Ubebuye abhoboke kimina athi usekhalela ngisho imali ayikhiphile efundisa izingane zakhe, okumanje sezingabameli kodwa kazimnakile.
“Ubengakufihli ukuthi singathuki uma ngelinye ilanga sesizwa ukuthi uzibulele ngoba useyehluleka wukumelana nale mpilo ayiphilayo yokuba yimpohlo emzini omkhulu kangaka,” kusho lo mthombo.
Umngani wakhe, uMnu Zwelithini Kheswa, uthi namanje akakakholwa ukuthi umngani wakhe akasekho.
“Mina ngizwe sengithintwa ngomakhelwane bakhe. Ingcindezi yokungahlali nomndeni wakhe abewuthanda kungenzeka ukuthi yiyona eyenze athathe lesi sinqumo ngoba ubeke asho ukuthi akaphathekile kahle.
“Ngifike selidume ladlula, ngisola ukuthi lesi sinqumo usithathe ngabo-2 ekuseni ngoba uze wabonwa ngumfana olusa izinkomo zakhe, othe uyangena endlini wa- mbona elenga egumbini lokugeza, wahlaba umkhosi,” kusho uMnu Kheswa.
Ithintwa inkosikazi kaMnu Cebisa, ivumile ukuthi uzilengisile, yacela ukuba ibuye ithintwe ngoLwesithathu, isazozwa emndenini wayo ukuthi ivumelekile yini ukuphawula ngalolu daba.
ILANGA seliphinda liyishayela ngoLwesithathu ekuseni, ucingo belukhala lodwa lungabanjwa. Kuze kwashaya isikhathi sokuloba lungaphendulwa.
Okhulumela amaphoyisa KwaZulu-Natal, uLt Colonel Thulani Zwane, usiqinisekisile isigameko sokutholakala kukaMnu Cebisa elenga emzini wakhe ngezithuba zehora lokugamanxa kwehora lesikhombisa ekuseni ngumfana obelusa izinkomo zakhe.
Uthi okwamanje amaphoyisa aseHarding esematasa enza uphenyo ngalesi sigameko.