Kuzohlangana omaskandi kwifestiveli
LMithente noBuselaphi bazosikhumbuza ezakudala
UMCULI kamaskandi, uBuselaphi Gxowa, neqembu aqembuke kulona, iMithente, bazokhumbuza abathandi bakamaskandi eminyakeni edlule besahlangene njengoba bezocula ndawonye kwiBuyelekhaya Masikandi Festival, eKing Edward Park, eGreytown, mhla ka-22 kwephezulu.
Kuzokhumbuleka ukuthi emuva kokuba uBuselaphi neMithente behlukene, kuvele izinsolo zokuthi imbangela wukuthi bebeseka amaqembu ahlukene ezepolitiki okuyi-IFP (iMithente) neNFP (Buselaphi). Kule festiveli bazoshaya izingoma ababezicula besendawonye.
Ngalokhu kuhloswe ukukhombisa abathandi bomculo wabo ukuthi emculweni akukhona empini futhi umculo uyibhizinisi kubaculi.
Umhleli walo mcimbi, uMnu Sipho “Geh” Ngcobo, uthi ngale festiveli bazama ukubuyisela okwabantu kubantu. Uthi abantu abaningi kabalitholi ithuba lokubona abaculi ngenxa yokuthi baculela emadolobheni.
“Abantu basemakhaya bazibukela kude izinto ezifana nalezi. Sinqume ukuba sibasondezele abaculi ababathandayo. Sigqugquzela nabantu ukuba babuyele emakhaya ngesikhathi samaholide, bangabi nesizathu sokuthi ubumnandi benzeka emadolobheni kuphela ngalesi sikhathi,” kusho uMnu Ngcobo.
UBuselaphi uthe iMithente yikhaya lakhe, ngabe akekho kuleli zinga akulona ukuba lalingekho leli qembu. Uthi ulijabulele leli thuba ngoba akasoze abengcono okudlula iMithente. “IMithente ingakhile yangiveza obala, langibona izwe, yingakho ngisho noma ngabe nginqoba emincintiswaneni ngihlale ngiphakamisa igama layo,” kusho uBuselaphi.
Uthe njengoba ekhiphe i-albhamu entsha ethi “Ungibulalisa Ngamazondo”, uzobe edlisela ngayo kulo mcimbi.
UDumisile Mthalane weMithente uthe sebekulungele ukuyojabulisa abantu eGreytown njengoba kulo nyaka leli qembu likhiphe nengoma eyisitayela esihlukile ethi “Nokuzula”, kuyona libambisene noZakwe oshaya i- hip hop.
“Siqhamuke nokusha kulo nyaka ngoba besifuna ukuba intsha engawuthandi umasikandi ibone ukuthi uyakwazi ukungena kuyona yonke indawo,” kusho uDumisile.
Kulo mcimbi kuzobe kungenwa ngo-R100. Kuboshelwe uKhuzani, uDlubheke, uDSD, uJaivazimnike, iGcokama Elisha, Abafana bakaMgqumeni, uMdumazi, uQhosha, uShwi noMtekhala, uBahubhe, uSgabiso, uMnikezwa, uNjoko, uMalahle, Amangcukumane, u-Ali Mgube, iNkosi yaMagcokama, uMajotha, iMfezemnyama, uDulasi nabanye.
ILANGA liyingxenye yabaxhasi balo mcimbi kanti abaphathi bohlelo nguBheki Cele weZwi Lomzansi FM, uZimiphi “Zimdollar” Biyela noMdonso Ngcobo boKhozi FM noNgizwe Mchunu.