AWAZUKWENYUKA AMAHOLO ONGQONGQOSHE
NGEKE enyuselwe amaholo amalungu ekhabhinethi emuva kokuba uMengameli Cyril Ramaphosa echithe isiphakamiso sokuba kwenyuswe amaholo amalungu amele umphakathi emazingeni ehlukene.
I-Independent Commission for the Remuneration of Public Office Bearers ibiphakamise ukuba amaholo anyuswe ngo-4%.
USomlomo wePhalamende, uNkk Baleka Mbete, ngeke lenyuke iholo lakhe elingaphezudlwana kukaR2,7 million ngonyaka. Kuzokwenzeka okufanayo nakusihlalo weNational Council of Provinces uNkk Thandi Modise nesekela lakhe, uMnu Reseriti Tau nakuMnu Lechesa Tsenoli oyisekela likaNkk Mbete.
Kanjalo nakondunankulu bezifu- ndazwe namalungu amakhabhinethi azo kuzo zonke izifundazwe ezingu-9 nawosomlomo bemikhandlu yezifundazwe.
“Umengameli uyakuqonda ukuthi ukuze uhulumeni wesekwe ezinhlelweni zawo, kumele wenze okubonakalayo okukhombisa ukuzinikela ekwenzeni izinto ngokucophelela” kusho uNkk Khusela Diko, okhulumela umengameli.
EZINKANTOLO
Amajaji aseNkantolo yoMthethosisekelo nawo wonke amanye amajaji, azonyuselwa amaholo ngo-2,5% kusukela ngoMbasa (April) wonyaka ozayo.
Izimantshi zona zizokwenyuselwa ngo-4%. “Maqondana namalungu ephalamende, ukwenyuswa kwamaholo ngo-2,5%, kuzokwenzeka kuzo zonke izigaba” kusho uNkk Diko.
Uthe namalungu ezishayamthetho zezifundazwe, amakhosi, yizindlovukazi nezinduna bazonyuselwa ngo-2,5%. Isimemezelo sikaMnu Ramaphosa siphume emuva kokuba iCosatu inxuse ukuba angakuvumeli ukwenyuswa kwamaholo phansi kwesimo sezomnotho esiya ngokuba nzima kakhulu.
Nakuba umnotho waseNingizimu Afrika unyuke ngo-2,2% kwikwata yesithathu yalo nyaka - obekusho ukuphuma phansi kwesimo senzikamnotho - kodwa usazabalaza kanzima. Iqophelo lokwesweleka kwemisebenzi lingaphezulu kuka-27% kanti izindleko zempilo sezenyuke kakhulu.