Luthembisa abalandeli isipho uThongathi
Bafuna ukuhlikihla usawoti enxebeni likaJomo Sono
LUZIMISELE ngokupha abalandeli isipho sikaKhisimusi uThongathi FC oluzogadulisana neJomo Cosmos koweNational First Division (NFD) ngoMgqibelo ngo15h30 eSugar Ray Xulu Stadium, eClermont.
Nakuba izinto zingahambi kahle kuThongathi FC kodwa uNkosinathi Chili ongumqondisi wale kilabhu, utshele ILANGA izolo ngoLwesithathu ukuthi uqine idolo ngakubona ejimini. Nokho uyakhala ngokuya kwalo mdlalo eCler- mont kwazise abalandeli babo sebejwayele ukubuka le kilabhu KwaMashu, ePrincess Magogo Stadium, evalwe yiPremier Soccer League (PSL) ngenxa yokungabi sesimweni sokusingatha imidlalo yale nhlangano.
Yingakho ethi kucishe kufane nokuthi bazowudlalela ekuhambeni. Uthi kabayesabi iCosmos kwazise bakwazile ukuyibuka ubuthaka iguqiswa yiRoyal Eagles ngo-2-0 ngeledlule eChatsworth. UJomo Sono ongumnikazi futhi ongumqeqeshi weCosmos, usazikhotha amanxeba ngemuva kwalesi sibhaxu.
“Kumele siyihloniphe iCosmos ngokwezinga layo. Ngeke siyithathe kancane kwazise wonke amakilabhu agijima kulesi sigaba azimisele ngokwenza kahle. Ngithokoziswa wukuthi sizokuya kulo mdlalo nesikwati esiphelele. Konke sekulele kubaqeqeshi bekilabhu ukuqoka iqembu eliqinile.
“Ngibona sengathi baseneshwa abagadli bethu esithembele kubona uSiyabonga Vilane noFrancis Baloyi. Nokho nginalo ithemba lokuthi inhlanhla yokushaya amagoli izobuya. Sinabadlali abahle ekilabhini kubalwa uSbusiso Magaqa noTsepho Liphoko ogijima esiswini,” kusho uChili.
UChili uthi kukhona nabadlali abasha abasajima nakuba engafunanga ukwanda ngabo kwazise kakukho osekuqediwe nabo. Uthi kabakasithathi isinqumo ngokusayinisa uSiyabonga Ngubane oke wagijima kwiMamelodi Sundowns ojima nale kilabhu.
Isiyonke imidlalo yeNFD ihlelwe ngalolu hlobo:NGOMGQIBELO E-Idas Valley Sports: Stellenbosch vs Cape Umoya United 15h30.
E-ABSA Tuks: Pretoria University FC vs Richards Bay 15h30.
Kanyamazane: Mbombela United vs Maccabi FC 15h30.
ESugar Ray Xulu: UThongathi FC vs Jomo Cosmos 15h30.
EPuma Rugby: Witbank Spurs vs Royal Eagles vs 15h30.
Kabokweni: TS Sporting vs TS Galaxy 15h30. NGESONTO E-Athlone: UBuntu Cape Town vs Real Kings 15h30. NGOMSOMBULUKO EThohoyandou: Tshakhuma Tsha Madzivhandila vs Ajax Cape Town 15h00.