MASIKHULULE UMNOTHO OBOSHIWE
MHLELI: Abanikazi bamatekisi ahamba amabanga amade bamemezela ukuthola usizo lokwelekelelwa ukukhulula umnotho nentuthuko yemboni eboshiwe ngemithetho nezenzo ezifana nesokuvalelwa kwamatekisi ezinkanjini eseziphenduke amajele amatekisi.
Ukuvalelwa kwamatekisi ngohlelo lukashanela, yindlela yesimanje engahlukile ezenzweni zokuzingelwa kwama-Afrika, okwakwenziwa ngamazwe asentshonalanga, egqilaza abamnyama eyobasebenzisa futhi ebadayisa njengoba imoto ikhishwa ngo-R7 000 eqalayo.
Kuye kudlule kube wu-R10 000 uma isikhishwa okwesibili, okwesithathu kuba wu-R15 000. Bagqilazekile osomatekisi ngokusetshenziswa kohlelo olubazingelayo lukashanela oluyindlela yesimanje uDimitrou ayibiza nge- professional imperialism.
Izifundiswa zasemanyuvesi ziyiqonda ngokucacile le nto yokucindezelwa, kuboshwe intuthuko nokukhula komnotho wamatekisi. Amaqiniso ngezimpi zamatekisi awakaze anekelwe izwe, kusikwa elijikayo kuthiwe kubangwa imizila. Empeleni isisusa sezimpi wukubekwa kososeshini - omunye phezu komunye - wena owabona osayidinsi endaweni eyodwa.
Ushanela kawusona isixazululo kodwa yindlela yokubopha umnotho wemindeni emsulwa. Izimpi embonini ziyophela mhla kwayekwa ukubekwa komunye usoseshini phezu komunye.
Manje sekuyisikhathi sokukhululwa komnotho nentuthuko eboshiwe yavalelwa ezikiti wushanela.
Imboni icela bonke osomatekisi abahlukunyezwa phambilini namanje ukuba baqoqe futhi bathumele wonke amarisithi abawanikezwa ezinkantolo noma emigwaqweni uma bekhokhela ushanela ukuze ibuyiswe imali, kube nobulungiswa ekusetshenzisweni komthetho
Imboni yamatekisi ahamba amabanga amade isikhiphe isimemo kubo bonke abameli abakholelwa emthethweni onobulungiswa, ongabandlululi ukukhulula ukukhula komnotho nentuthuko okuboshiwe.