Kuhlekiswe "ngebhantshi" le-Chiefs kweyeMDC
ABALANDELI be-Orlando Pirates bachukuluze abeKaizer Chiefs ngonozinti wayo obozayo kwacishe kwasuka uthuthuva ngesikhathi kunemidlalo yeMulti-Choice Diski Challenge ebivakashele oLundi Stadium, okokuqala ngqa ngempelaSonto.
IChiefs nePirates bazobhekana kowe-Absa Premiership ngoMgqibelo ngo-15h30 eFNB Stadium, eSoweto.
Ngesikhathi iChiefs ihlula ngo3-1 iCape Town City koweMDC ngoMgqibelo emini, abalandeli beBucs abebephume ngezinkani ukuzobuka le midlalo bachukuluze abeChiefs ngoVirgil Vries ( osesithombeni) ongunozinti wayo bethi bacela afakwe kulo mdlalo womkhaya ngoba vele uzobenzela umsebenzi.
UVries usematheni kulezi zinsuku njengoba edlisele iChiefs ibhekene neCape Town City ehlulwa wukunqaka ibhola kwangena igoli.
Ubengaqali njengoba nasemdlalweni weMamelodi Sundowns enze iphutha elifanayo.
Kuyona yomibili le midlalo iChiefs ihlulwe ngenxa yakhe.
“Besicela umqeqeshi angamshiyi ngaphandle uVries ngoba wenza umdlalo ube mnandi noma iChiefs ingasibamba kodwa siyazi ukuthi unozinti wayo kukhona okuhle azosenzela khona njengoba eyindoda enomusa kakhulu futhi engancishani ngamaphuzu kule sizini.
"Uma ufuna isinciphisa mafutha emzimbeni asisekho isidingo sokuthenga izinto ezibizayo into okufanele uyenze ukuthi ulandele iChiefs ukuze ukwazi ukuncipha emzimbeni,” kusho omunye umlandeli weBucs esekwa ngozakwabo.
Le nkulumo ayehlanga kahle kubalandeli beChiefs bazama ukususa umsindo kodwa bakhuzwa.
Nokho bagezeke igilo yindlela iqembu labo leMDC elidlale ngayo baze balibeka ngesihloko elokuthi kungaba ngcono laba abesikimu esincane banyuselwe kwesikhulu bese laba abakwesikhulu behliselwe kwesincane.
Imiphumela yemidlalo yeMDC isiyonke ngempelasonto ihambe kanje:
Free State Stars Reserves 0, Orlando Pirates Reserves 2;
Baroka FC Reserves 2, Bloemfontein Celtic Reserves 1; Black Leopards Reserves 0, Polokwane City Reserves 0; Maritzburg United Reserves 0, AmaZulu Reserves 2, SuperSport United Reserves 4, Bidvest Wits Reserves 2;
Cape Town City FC Reserves 0, Kaizer Chiefs Reserves 3; Highlands Park Reserves 4, Chippa United Reserves 1; Golden Arrows Reserves 1, Mamelodi Sundowns 1. UMQEQESHI weqembu lesizwe lakuleli lika-U/20 elidume ngamaJita uncoma isibindi esikhonjiswe ngabadlali bakhe yize bebebhekene nobunzima.
AmaJita ayivule kahle imidlalo ye-U/20 Afcon ebambana ngo-1-1 neNiger koka-group A kowokuvula lo mqhudelwano ngoMgqibelo ntambama kulo leliya lizwe.
INiger iyona evule inkundla ngegoli elibekwe enethini nguBoubacar Goumey kodwa lacinywa ngelikaSiphesihle Mkhize.
AmaJita athwale kanzima kulo mdlalo njengoba inkundla ibigcwele phama abalandeli beNiger abebememeza umdlalo wonke.
Ngaphandle kwalokho, belikhipha umkhovu utsheni njengoba kuthiwa amazinga okushisa akhuphuke aze afika ku-40.
UThabo Senong ololonga amaJita uncoma isibindi esikhonjiswe ngabadlali bakhe kulo mdlalo.
“Bekunzima angifuni ukuqamba amanga. Indlela inkundla ebigcwele ngayo kwamina bengithukile.
"Into ebingishayisa ngovalo wukuthi iningi labo alijwayele ukudlala esimweni esinjeyana, nelanga livele lashisa ngenye indlela exakile. Ngiyajabula ngoba sithole iphuzu,” kusho uSenong.
AmaJita kuzokuthi kusasa ngoLwesibili ngo-16h30 abhekane neNigeria khona eNiger.
“Ngomunye umdlalo ozoba nzima lona kodwa ngikholwa wukuthi singawunqoba. Ngikholwa wukuthi abadlali bami sebeyazi manje ukuthi babhekene nani uvalo alusekho.
"Sibe nethuba lokubabuka behlula ngo-2-0 iBurundi, bayingozi uma behlasela kodwa sinalo isu lokubabamba. Sizozama ngawo wonke amandla ukuwunqoba lo mdlalo,” kusho uSenong.