ITHEMBA KWI-EAGLES IQOQA AMAPHUZU
KUBUYE ithemba lokungena kwiAbsa Premiership kwiRoyal Eagles ihlula ngo-2-0 iTshakuma Tsha Madzivhandila koweNational First Division (NFD) ngoMgqibelo ntambama eThohoyandou Stadium, eVenda.
Amagoli e-Eagles ashaywe nguStrydom Wambi noDillan Solomons.
UJames Dlamini oyimenenja jikelele ye-Eagles uthi le wini ibuyise ithemba lokuthi le kilabhu isangangena ngembobo yenaliti kwiPremiership.
“Ngendlela ilanga ebelishisa ngayo, umdlalo kuphoqelekile ukuthi umiswe izikhawu ezintathu ukuze abadlali baphuze amanzi.
Kulobo bunzima abadlali bethu basebenze kanzima kanti okuhle kakhulu wukuthi abazange badedele goli. Le wini ibuyise ithemba lokuthi sisangangena kwiPremiership,” kusho uDlamini.
Kuzo ezeNFD, uZipho Dlangalala ocija iTuks unqobise okokuqala ngqa le kilabhu nonyaka ezakhe zibhudluza iWitbank Spurs ngo-3-1 koweligi e-Absa Tuks Stadium, ePretoria.
Isiyonke imiphumela yemidlalo yeNFD ihambe kanje:- Cosmos 2, Mbombela 0, Kings 0; Uthongathi 1; Stellenbosch 2,UBuntu 0; Bay 2,TS Sporting 1; Cape Umoya 1, TS Galaxy 0 ; Tuks 3, Spurs 1; Maccabi FC 0, Ajax Cape 1; Tshakhuma 0, Royal Eagles 2. KULINDELEKE igixabezwe ngamaphuzu angu-6 iGreen-Wood Park Friends (GWP) njengoba kuvela ukuthi amacala abebhekene nayo angene ngoLwesihlanu kusihlwa eMgungundlovu kubhekwe avune yona.
IFriends ihlule ngo-2-1 i-X1 Experience koweSafa KZN ABC Motsepe League ngoMgqibelo ntambama eWorkington Grounds.
Amagoli eFriends avalelwe enethini nguThabo Meko noZakir Mohamed.
Kuvela ukuthi le kilabhu ingase iphinde ijabule njengoba kuthiwa amacala amabili ebibhekene nawo ingase iwanqobe.
IDurban FC neLadysmith badube imidlalo yeligi ngokwehlukana bebhekene nale kilabhu bekhala ngokuthi bayarojwa.
Leli phephandaba lithole ukuthi iFriends izowawina lamacala bese inikwa amaphuzu angu-6.
Isinqumo kubhekwe siphume namuhla ngoMsombuluko.
U-Angus Abrahams ongumnikazi weFriends uthi babambe umoya ngalama cala kwazise kusengenzeka ushintsho esicongweni.
IDurban FC ihlule iKwaDabeka Sporting ngo-2-1 koweligi ngoMgqibelo, eKing Zwelithini Stadium. Amagoli eDurban FC ashaywe nguThalente “Sticks” Mbatha no-Aphinda “Mlungu” Zodala, eleSporting lashaywa nguThabani Mthembu.
UMvoti FC ushaye iMaritzburg City ngo-2-1 ngoMgqibelo eMpumalanga Stadium. Amagoli oMvoti ashaywe nguSgcino Mhlongo noThobani “Mdefu” Mthembu, eleCity lashaywa nguFezile “Ozil” Ngcobo.
Imiphumela yemidlalo yeSafa KZN ABC Motsepe League imi kanje:- Wanderers 1, Dynamos 0; KwaDukuza 0, Rainham 0; Friends 2, XI Experience 1; Ladysmith Utd 0; Natal 0, Pmb City 1, UMvoti 2; Durban FC 2, Dabeka 1.