Kufezeke iphupho lethu ngeyeMDC oLundi
NGIBE nenhlanhla enkulu ngithola ithuba lokubuka abadlali abasakhula bamaZulu FC abagijima kwiMDC bedlala neMaritzburg United. Le midlalo beyibanjelwe ePrince Mangoosuthu Stadium okokuqala.
Kufezeke iphupho lethu ekade saba nalo noMntwana wakwaPhindangene, iNkosi Mangosuthu Buthelezi njengoba kusungulwe neLegacy Cup kuyo le ndawo ngaphansi kukaMasipala waseZululand.
Lokhu kukhombisile ukuthi lo Masipala ungakwazi ukwamukela kumbe umumathe abalandeli bakanobhutshuzwayo ngaphandle kwezihibe.
Le ndawo ayinaso isiphithiphithi yingakho sinqume ukusungula iLegacy Cup ukuze kuvuleke amathuba omsebenzi.
Okube kuhle kakhulu wukubona uMntwana ehambele le midlalo esethemba ukuthi uyithakasele.
Ngizohlangana nomasipala waseZululand nowasoLundi ukuze sibone ukuthi yiziphi izinhlelo esingaqhamuka nazo ukuze ibhola lisondele kule ndawo.
Ubudlelwano bethu nalabo masipala ngifisa bukhule kakhulu budlondlobale. UMA kuvulwe iwindi lokudayiselana ngabadlali kithina kusuke kungesisona isikhathi sokuthi sivele nje senze izinguquko noma yikanjani, kufanele silande abadlali abazoba wusizo eqenjini.
Konke esikwenzayo sikwenza ngoba kunesidingo, ngeke sivumele ukubanjwa ngobhongwane ngabezindaba.
Kube nezinkulumo eziningi ngodaba luka-Emiliano Tade efunwa yiMamelodi Sundowns singakaze sikhiphe sitatimende.
Imali esiyithole ngokudayisa uTade isijabulisile saphinde sazothola uBongi Ntuli ngaphezulu.
Kumqoka ukufunda bese sikwazi ukwenza inzuzo khona lapho. Uma ubuka iminyaka kaTade kube yisibusiso uma kuqhamuka ikilabhu ebimdinga ukuze senze inzuzo ngaye.
UTalent Chawapiwa esisanda kumsayinisa kwiBaroka FC ungumdlali ebesikade simlobizela ngenxa yokudlala kahle kodwa isikhathi besingavumi. Sijabulile kakhulu ngoba sigcine simtholile. UDABA lukaMabhuti lube nezinguquko eziningi esikhathini esifushane.
Sithole ukuthi usule isigubhukane kwiMaritzburg United abengumsizi womqeqeshi kuyona.
Sengike ngaba nezingxoxo nabaphathi ngenhloso yokumbuyisa.
Nginethemba lokuthi ngeke kuhambe isikhathi eside udaba lwakhe lungaxazululiwe ngoba ungumuntu oqotho. NGIPHOXEKE kakhulu ngemuva komhlangano ebesinawo nabalandeli ngeledlule.
Ukuze sikwazi ukuphumelela kufanele kube nokubambisana phakathi kwabalandeli nabaphathi bekilabhu.
Ukuhloniphana nokuthembana kumqoka ngendlela eyisimanga.
Le kilabhu ithandwa ngabalandeli abangaphezulu kwesigidi abanemibono yabo eyehlukene ngakho-ke kubalulekile ukubekezelelana.
Akufanele abalandeli bafake ingcindezi yokuba kuxoshwe umuntu uma ngabe izinto zingahambi kahle.
Ukusisabisa nokudala udlame akukaze kulungise isimo.
Kufanele abantu abaqashiwe sibethembe ngisho kunzima.
Kufanele abaqeqeshi nezikhulu zekilabhu banikwe ithuba benze umsebenzi ngendlela.
Akufanele sithande umqeqeshi ngoba eshaye iMamelodi Sundowns kodwa meke wehlulwa yiCape Town City, usephenduka isitha.
UCavin Johnson kufanele anikwe ithuba kwazise uzinikele emsebenzini wakhe, masimeseke.
Ngiyababonga abalandeli abafike ngesikhathi sibhekene neSundowns bafike bacula umdlalo wonke.
Ngiyabancoma kakhulu nangokuziphatha kahle.