Ubanjwe eyozibulala umakoti 'wesithembu'
UBANJWE ezama ukuzibulala owesifazane okusabalele izithombe zakhe ezinkundleni zokuxhumana namadoda amabili angamawele, okuvezwe ukuthi ubeshada nawo eBandleni lamaNazaretha, ohlangothini lwaseBuhleni ngempelasonto edlule.
Lona wesifazane ongu-Amanda Gumede, ubebopha ifindo likasofa silahlane nesinqandamathe sakhe, esinguMnu Zakhele Mnguni (25) ebesimiswe yiwele laso elinguMnu Sakhile Mnguni (25), kodwa kwagcina sekusabalala ukuthi uMaGumede unesithembu njengoba enye yawo ibizwakala kwi- video ithi sebeshadile nomakoti wabo njengoba izwe libona ukuthi nendandatho bayifake bobabili futhi-ke noma esephaka umakoti uzobaphakela bobabili.
Ekhuluma neLANGA udadewabo kaMnu Mnguni obeshadelwa, ozichaze njengoNkk Mthembu kuleli phephandaba, uthe ukusabalala kwalolu daba ngendlela engeyona, sekudale umonakalo omkhulu emndenini njengoba nomalokazana eseke wazama ukuzibulala kodwa wabanjwa ngumyeni wakhe.
“Kwawona amawele asedinga ukululekwa ngokomqondo njengoba esehlale ezivalela endlini emuva kokusabalala kwalezi zindaba. Kawalali nayizingcingo efonelwa ngapha nangapha.
“Laba bantu abenze le nto kabagcinanga ngokuhlaza igama lomndeni, bahlaze negama lebandla laseBuhleni ngoba akukaze kwenzeka ukuthi inkosikazi ishade namadoda amabili. Siphoxekile siwumndeni futhi nomakoti bamehlise isithunzi bemenza isif...esishada amadoda amabili.
“Akekho ongazi ukuthi ngokwesiko iwele uma lishadelwa naleli elinye liyaye lime eduze komfowabo ngoba bathathwa ngokuthi bangumuntu oyedwa,” kusho uNkk Mthembu.
Uthe bayafisa ukuthathela izinyathelo zomthetho abasabalalise lolu daba oselushaye ngisho uyise, okumanje usenyukelwe wushukela nomfutho wegazi ngenxa yokuhlazeka kwezingane zakhe ngale ndlela.
ILANGA lishayela uSakhile obemise umfowabo, oveze ukuthi konke lokhu okusabalele kungamanga aluhlaza, eqinisweni obeshadelwa ngumfowabo. Uthi lokhu abebekwenza kuwusiko.
“Kuyangixaka uma abantu sebesabalalisa izindaba ezingekho, kuwumkhuba ojwayelekile ukuthi amawele enze into efana nale. Ngisho iwele lishonile, kuyenziwa lokhu esikwenzile. Isiphoxe kakhulu le nto eyenzekile yokudicilela phansi isithunzi sethu yaphinda yasifaka enkingeni.
“Besingafisi ngisho ukuphawula ngale nto njengoba sifuna nokuthatha izinyathelo zomthetho ngayo,” kusho uMnu Mnguni.
Wale waphetha ukuthi kukhulunywe nomfowabo nomkakhe njengoba eveze ukuthi kabekho esimeni esihle ngokomqondo ngenxa yalolu daba.
Umfundisi obebashadisa, uMfu Mthandeni Ntombela, wale waphetha ukuphawula ngalo mshado. Uthe ucela kuthintwe okhulumela ibandla, yena akalikhulumeli. Okhulumela amaNazaretha aseBuhleni, uMnu Thokozani Mncwabe, uthe uma kuwukuthi laba abashadayo bebenza usiko, bekufanele balwenzele ekhaya, hhayi eBuhleni.
Uthe lolu daba yena ngeke aphawule kakhulu ngalo uzoyekela abefundisi bathathe isinqumo. INkosi yesizwe sabaKhwanazi bakwaMpukunyoni (eMtubatuba), uMzokhulayo Mkhwanazi, ikhuze umhlola, izwa indlela lolu daba oluphume ngayo emphakathini.
“Ngize ngathi ubaba ongizalayo wafa singakaboni uma intsha isizokwenza izinto ngalolu hlobo. Lolu daba lusazocutshungulwa, kulindeleke ukuba induna yesizwe izochazela inkantolo yenkosi ngalo mshado namhlanje (ngoMsombuluko)," kusho iNkosi uMkhwanazi.
Isazi sezamasiko, uSolwazi Velaphi "VVO" Mkhize, sithe lokhu obekwenziwa ngamaphahla akwaMnguni nomlobokazi uMaGumede, kuwusiko olwaziwayo.
“Ngisho kushone elinye iwele elisele lingena kuqala emgodini ngaphambi kokuba kungene ibhokisi ngoba kusuke kwenzelwa ukuthi oseshonile angamlandi osele.
“Kunjalo noma eshada, kwenziwa into efanayo, osuke eshada umiswa yiwele lakhe nakhona kusuke kwenzelwa ukuba lo ongakashadi naye agcine emtholile uphathina wakhe.
“Okokuthi bafake izindandatho bonke, kakulona usiko,” usho kanje uSolwazi Mkhize.