Basale dengwane kuhlasela isiphepho

KULIMALE abantu abane imindeni eminingi yasala dengwane ngesikhathi kuhlasela isiphepho esinamandla eMbulweni, eLadysmith, ngoMgqibelo ntambama. Lesi siphepho okuthiwa sithathe imizuzu ewu-30, sivunguza, sishiye imizi engaphezulu kwewu-70 icekeleke phansi kwasala dengwane abantu abangu-400.

Ekhuluma neLANGA uNkk Thembisile Msibi (61), oyisakhamuzi kule ndawo, uthe basola ukuthi "yinkanyamba" le ebibahlasele njengoba izulu livele lahloma lamnyama kwaba nesishingishane esihambisana namafu obekukhona kuwona nelimnyama.

“Sithe sisahleli sonke endlini nabantwana, sabona sekudlula uthayela uyohlala phambi kwendlu. Lo thayela ubusuka emjondolo ohlala indodana yalapha ekhala, uLucky, ethe iyaphuma endlini iyabaleka, yashaywa yisitini emlenzeni yaphuka.

“Siphume lapho endlini sabaleka saya komakhelwane. Sibuye nalena eyethu indlu isiwile, zonke izimpahla ziphukile, izingubo nemibhede kumanzi te,” kusho uNkk Msibi.

UMnu Mduduzi Mzinyane naye oyisakhamuzi, uthi indlu yakwakhe enamakamelo amane iphephuke yonke kwasala kuyigceke lapho ebikhona.

“Kumanje ngisazama izibonda, ngishayele umjondolo esizolala kuwona. Sicela usizo noma ngabe ngolwetende, sesingalala nakulona,” kusho uMnu Mzinyane onomndeni wabantu abawu-13 kwakhe.

Izolo ngeSonto uMnyango wezo- kuBusa ngokuBambisana nezoMdabu KwaZulu-Natal, uvakashele kule ndawo ukuyobheka umonakalo odalekile. UNgqongqoshe walo mnyango uNkk Dube-Ncube, uthe bazokwenza konke okusemandleni ukusiza imindeni ethintekile.

“Sisebenzisana nezimeya nethimba lezinhlekelele ukubheka ukuthi le mindeni esele dengwane ingasizwa ngani,” kusho uNkk Dube-Ncube.

IZITHOMBE: ZITHUNYELWE UNKK Thembisile Msibi ehleli nendodana yakhe uMnu Lucky Msimbi ophume ngembobo yenaliti kuwa indlu ephakathi wagcina elimala emlenzeni eshaywa yisitini ezama ukubaleka. Kwesingakwesokudla isale ikhamisile imizi kwacekeleka phansi nempahla ngenkathi kuhlasela isiphepho esinamandla.