KUBOSHWE IKHANSELA NGELOKUDLWENGULA
Lidlule ngehubo nevolontiya le-ANC
LIKHALELWE ngamasongo kasiGonyela ngeledlule ikhansela le-ANC kuMasipala waseMatatiele, e-Eastern Cape, ngezinsolo zokudlwengula owesifazane oyivolontiya (32) laleli qembu, okusolwa ukuthi ubethandana nalo.
Leli khansela - esingeke silidalule anduba livela enkantolo lisho ukuthi icala liyalivuma noma cha - kubikwa ukuthi lihambele ekhaya laleli volontiya ngoMgqibelo se- ngathi lifuna baxoxe ezamagatsha eqembu njengoba kulungiselwa ukhetho.
Kuthiwa uhambile nalona wesifazane bayobeka elinye ilungu leqembu ababehamba nalo endaweni elihlala kuyona.
Endleleni ebuyayo, umsolwa kuthiwa akabange esama ngakubo kwalona wesifazane, njengoba bekufanele amshiye khona. Kuthiwa owesifazane uzamile ukujomba imoto ihamba, kodwa kwatholakala ukuthi ibikhiyiwe.
Amaphoyisa athi umsolwa uthole indawo yokuma lapho evimbe owesifazane ngesikhathi ezama ukubaleka, emuva kwalokho wazithathela ucansi ngodli.
Okhulumela amaphoyisa easeMaluti, uCapt Raphael Motloung, uthe icala lokunukubeza ngokocansi liyaphenywa, eyokuthi umsolwa nommangali bebejola, kabayazi bengamaphoyisa.
Umsolwa uvele eNkantolo yeMantshi yaseMatatiele ngoLwesihlanu, icala lakhe lahlehliselwa inamuhla ngoMsombuluko ukuze afake isicelo sebheyili.
Iqembu lakhe umsolwa likubeke kwacaca ukuthi kalihambisani nhlobo nezigameko zokuxhashazwa kwabantu besifazane, yingakho lizohlala nje kuleli sonto linqume ngekusasa lakhe.
“Ngeke silinde ukuphela kwecala elingase lithathe iminyaka, kodwa sizohlala sicubungule lo mbiko, sithathe isinqumo sokuthi mhlawumbe ake ame eceleni umsolwa, abhekane necala lakhe,” kusho uMnu Vukile Mhlelembana, ongunobhala we-ANC esifundeni i-Alfred Nzo.
Uthe nokho bayazi ukuthi ngokomthetho umsolwa usemsulwa kuze kube ulahlwa yicala, kodwa ngoba bafuna umthetho usebenze ngaphandle kokuphazamiseka, kuzofaneke nawo bawunikeze lelo thuba.
Usihlalo we-ANCWL e-Alfred Nzo, uNkk Nomvuyo Msokana, uthe okwamanje umsolwa usasolwa kodwa beyiqembu kabahambisani nhlobo nezigameko ezithinta ukuhlukunyezwa kwabantu besifazane.