UFISA UKUBUYA OXOSHWE YI-BUCS
ULUBALUBELA ukubuyela kwiOrlando Pirates umgadli oxoshwe yile kilabhu ogila izimanga kwiAbsa Premiership nekilabhu yakhe engomakoti beligi, iBlack Leopards.
ILeopards izobhekana ne Mamelodi Sundowns kowe-Absa Premiership ngoLwesithathu ngo19h30 eLoftus Stadium, ePitoli.
IDowns izoya kulo mdlalo iqaphile njengoba iLeopards iphethe umgadli ongalibheki ipali, uMwape Musonda odabuka eZambia.
Lo mgadli uyena oziholayo ngokuhlohla amagoli kwiligi njengoba eseshaye angu-8 selokhu kuqale isizini.
Ngeledlule uhlabane ngomklomelo wokuba ngumdlali ovelele wenyanga kaZibandlela (December) noMasingana (January).
Lo mdlali uvutha kangaka nje, sekunesikhathi efikile kuleli njengoba elandwe yiBucs kodwa washaya udaka kuyona yabe isimbolekisa kwiLamontville Golden Arrows.
NakwiArrows ufike waba buthuntu yambuyisela emuva, iBucs yabe isimxosha.
Utakulwe yiLeopards ebidlala kwiNational First Division wafike wayisiza yabuyela kwiPremiership.
Lo mdlali uthi inhliziyo yakhe iyansonsotha uma ecaba- nga ngeBucs ngoba ukholwa wukuthi imxoshe ngaphandle kokumnika ithuba.
“IPirates iyohlale isenhliziyweni yami ngoba iyona enginike ithuba lokuzodlala eNingizimu Afrika.
"Nangesikhathi ngishaya igoli sibhekene nayo akuvumanga ngijabule ngoba ngisayithanda ngeke ngikufihle lokho.
"Ngiyahalela ukubuyela kuyona ngelinye ilanga ngoba ngikholwa wukuthi angifeyilanga, yithuba elenele engingalitholanga. Bengisafika ngisafunda iligi yabe isingixosha.
"Ivele iqaqambe inhliziyo yami uma ngicabanga ngayo.
"Kodwa nginethemba lokuthi ngelinye ilanga ngizobuyela kuyona ngiyoqedela umsebenzi engiwushiye ulenga.
"Kodwa-ke okwamanje umqondo wami kufanele ngiwugxilise kwiLeopards ngiqhubeke nokwenza kahle kuyona okunye kuyozenzakalela,” kusho uMusonda.
Ephawula ngomdlalo weSundowns uthi babheke ukuthi ube nzima.
“Umdlalo uzoba nzima ikakhulukazi njengoba beshaywe ngamaZulu ngo-2-0 koweligi.
"Silindele ukuthi beze ngamandla kithina.
"Kodwa-ke bazosifica sibalindele ngoba siyakwazi thina okufanele sikwenze uma sibhekene nala makilabhu okuthiwa makhulu.
"Sizolwa kulo mdlalo lokho angikungabazi,” kusho uMusonda.
Imiphumela yemidlalo yeAbsa Premiership ihambe kanje:Baroka FC 1, Chippa 1; Celtic 3, Leopards 0; Arrows 2, Highlands 1; Bidvest 1, Wits 0;
OweFree State Stars nePolokwane City obekufanele ube ngoMgqibelo kusihlwa eGoble Park Stadium, eFree State kawubanga khona ngenxa yemvula enamandla.