Kusolwa ipolitiki kuma ukufunda
KUSOLWA impi yezepolitiki ngombhikisho oholele ekumeni kokufunda okuqale ngoMsombuluko odlule ezikoleni ezintathu zaseMthonjeni, eNgwavuma. Lezi zikole yiKhobongo High School, eMthonjeni Primary School naseJuba Primary School.
Umphakathi waku-ward 14, eJozini, uvale imigwaqo ngamatshe nezingodo ukhala ngokugqoza kwentuthuko okufanelwe uhlinzekwe ngayo wuMasipala waseJozini.
Ukhala ngokungabikhona kuka- gesi kulezi zikole - okumanje akufundwa kuzona - wukungabikhona kwamanzi, amathuba emisebenzi nokulinda umnyama ongenafu mayelana nezethembiso.
Ababhikishi bathi kabanankinga nokuthi kuphazamiseka ukufunda ezikoleni ngoba izingane ngezabo. Bathi kuyolamula ukuya kukaNgqongqoshe wezokuBusa ngokuBambisana nezoMdabu KwaZulu-Natal, uNkk Nomusa Dube-Ncube ukuyobhula umlilo kule ndawo.
Amalungu omphakathi athi afuna ukunekela ungqongqoshe ngokwenzeka kule ndawo. Asola iMeya yaseJozini, uMnu Delani Mabika, nangokungazigcini izethembiso nokuthi ibenesandla ekubeni kuthathwe ugesi wakwenye indawo ku-ward 17, wayofakwa kwenye okuthiwa yisesiHlangwini - khona ku-ward 14.
UMnu John Nyawo oyisakhamuzi kule ndawo, uthe le nkinga iyoxazululwa wukufika kuka Nkk DubeNcube. “Siyeke nje ngendaba yezingane ezisemakhaya, lokho sikuxoxile thina ukuthi kuzohamba kanjani. Ngeke phela ukuthi sizolwela izingane zona zibe zifunda.
“Siziyalele ukuba zibuye zibe nathi lapha embhikishweni njengamasosha akusasa, okufanele abambe iqhaza ekwakhiweni kwalesi sizwe. Sikhathele wukuxhashazwa kwamavoti ethu, imeya yafika lapha yasethembisa ukuthi izozilungisa izidingo zethu.
“Simashile kwangenzeka lutho, kwahlelwa imihlangano yokuthi nayo (imeya) ibe- khona nethimba layo kodwa kwangenzeka lokho,” kusho uMnu Nyawo.
UMnu George Mafuleka, naye oyisakhamuzi kule ndawo, unuke ikhansela likaward 14, uMnu Mandla Ndlela, ngokugovuza umphakathi ukuba ubhikishele lo masipala ngoba uholwa yi-IFP.
“Le nto yenziwa nayikhansela lethu lapha endaweni ngoba lilwa izimpi zalo zepolitiki yangaphakathi kumasipala noMabika. Kubi lokhu okwenzekayo ngoba manje siphazamiseka sonke ngendaba nje ye-ANC ne-IFP.
“Sikuphi nje isidingo sokuthi abantu bakhalele ukuthi ugesi ufakwe eSihlangwini ngoba nabantu bakule ndawo bangabavoti bakuward 14? Thina-ke sesiyazi ukuthi yi-ANC ehlele imibhikisho kuzo zonke izindawo ezingaphansi komasipala abaningi ngenhloso yokuphazamisa izinhlelo zokhetho njengoba kuzovotwa.
“Okwalapha kuyangixaka ngoba bahlala bezwa uhulumeni uthi akufanele kube nehora eledlulayo abafundi bengafundanga lutho.
“Kulungile, makafike ungqongqoshe, sizomcela ukuba akhuze futhi ayalele ukuba kuboshwe laba bantu beqembu lakhe abaphazamisa ukufunda. Babiza izingane ngamasosha zibe zilahlekelwa yikusasa lazo,” kusho uMnu Mafuleka.
NgoLwesine kuxoshwe kwachashwa ngenhlamba izikhulu zomnyango wezemfundo ebezihamba noMnu Mabika ziyoxoxa nomphakathi. Umholi walo mbhikisho, uMnu Senzo Mkhumane, uthe: “Kumanje sihlela ukugasela emahhovisi oMnyango wezokuBusa ngokuBambisana eMkhuze, lapho siyoqhinqa ngaphakathi kuze kube wukuba sinikwa impendulo ephathekayo.”
Imeya ithe akukho engakuhambisi ngokohlelo kulo mphakathi, yangathanda ukwanda ngalolu daba. Imizamo yokuthola uMnu Ndlela iphunzile njengoba ucingo lwakhe bekhala lungabanjwa.
Okhulumela uMnyango wezeMfundo KwaZulu-Natal, uMnu Kwazi Mthethwa, ukugxekile ukuvalwa kwezikole. Uthe umphakathi akufanele uvale izikole ngoba kuzona kusatshalaliswa imfundo kuphela, intuthuko inezikhungo zayo okufanele kuqondanwe nazo uma kudingeka yona.
Okhulumela amaphoyisa eMkhanyakude uCapt Thulani Mdletshe, uthe isimo siqashwe ngelokhozi, kazikho izigameko ezimbi ezisabikiwe ngalo mbhiki-sho ngaphandle kokuvalwa kwezikole.