I-DUT IZOPHENYA NGOKUFA KOMFUNDI
IFUNA kuxoshwe inkampani yonogada eDurban University of Technology (DUT), i-Economic Freedom Fighters Student Command (EFFSC) emuva kokushona komfundi okusolwa ukuthi udutshulwe ngunogada esifubeni ngoLwesibili njengoba abafundi bebhikisha.
UMnu Mlungisi Madonsela (20), waseJozini, ubenza unyaka wokugcina kwiBusiness Administration, ushone ngokudutshulwa. Umengameli wesigungu sabafundi eDUT, uMnu Sesiyanda Gwedlimpi, uthe alukho olubi olwenziwe nguMnu Madonsela ukuthi usengaze abulawe, ubengaphethe ngisho isilimazo.
“Sizolwa kuze kube sekugcineni ngoba kabukho ubuhlungu obufana nesibubone kubulawa umfundi phambi kwethu. Unogada udubule amahlandla amathathu, sabona uMlungisi esebamba isisu walala phansi. Uphuthunyiswe esibhedlela, kwamehlula ukufa.
"Kwenzeka lokhu nje, besingalimazi ngisho impahla yesikole, abafundi bebeziculela, bezwakalisa ukungathokozi njengoba kunenqwaba yezingane ezingalutholile uxhaso lweNational Student Financial Aid (Nsfas), zivaliwe kazikwazi nokubhalisa ngokugcwele ngenxa yezikweletu.
"Abanye abafundi kabanazo izindawo zokuhlala, inyuvesi ayibaniki,” kusho uMnu Glwedlimpi. Uthe ngeke kuqhubeke ukufunda eDUT njengoba sekubulawe umfundi, kuze kube kulungiswa zonke izinto abafundi abakhala ngazo.
Uthe akulona iqiniso okukhulunywa yiziphathimandla zenyuvesi kokuthi abafundi bebehlasela isakhiwo sesikole nezisebenzi.
“Inyuvesi inamakhamera kuyo yonke indawo, singakuthokozela ukukhonjiswa ubufakazi obugciniwe, obuveza abafundi behlasela. Lo mfundi obeyithemba lakubo, ekugcineni usezobulawa endaweni ebesikholwa wukuthi iphephile,” kusho uMnu Gwedlimpi.
Ilungu lomndeni kamufi, uMnu Simanga Madonsela, kalivumanga ukuphawula, lathi kalikho esimeni sokukhuluma.
Umphathi wenyuvesi, uSolwazi Thandwa Mthembu, udlulise amazwi enduduzo emndenini nakubona bonke abafundi baseDUT ngokwenzekile.
Uthi bathole umbiko othi kunabafundi abacekela phansi ibhilidi elibizwa nge-Open House kulesi sikhungo, kwabe sekuphuthuma onogada, okuyikhona okuholele kulesi simo. Utshele abezindaba ukuthi inyuvesi yenza uphenyo lwayo, onogada ababili benkampani i-Excellence, bathathwe ngamaphoyisa bayophenywa.
Okhulumela amaphoyisa KwaZulu-Natal, uColonel Thembeka Mbhele, uthe kuvulwe icala lokubulala. Bheka nasekhasini 22.