Kubulawe induna ngemvula yezinhlamvu
Kuthiwa ibisilindele, yabalekisa inkosikazi nezingane
IDUTSHULWE ngentululwane yezinhlamvu induna yaseMqeleni, eMlalazi, ebisolwa ngokweba imfuyo ihlangene namalungu omphakathi esigodini sayo.
Kuthiwa uMnu Jabulani Ngwenya (56) udutshulwe wabulawa ngoLwesibili ntambama eseyongena nje kwakhe ephuma emsebenzini
Imithombo yeLANGA ithi isimo siqale ukuba manzonzo kule ndawo kusukela ekupheleni konyaka owedlule.
“Indaba iqale ngesikhathi induna namanye amalungu omphakathi esondelene nawo besolwa ngokweba izinkomo endaweni, udaba lwabo lugcine luyokhulunywa konkosi. Ngesikhathi kukhulunywa, kuvele ukuthi akukho okuthinta induna emacaleni okwebiwa kwemfuyo, abantu abebethinteka ngabasondelene nayo,” kusho umthombo.
Uqhube wathi indaba iqale ukushuba kakhulu ngesikhathi kubu- lawa amalungu amabili omphakathi ngasekupheleni konyaka odlule, abesolwa ngakho ukweba imfuyo.
“Selokhu kubulawe laba, isimo kasisihle endaweni. Kuthe ngoZibandlela (December), kwaphinde kwadutshulwa kwabulawa enye yamadodana enduna, uMnu Sibongiseni Ngwenya. Kulo nyaka kuhlaselwe umndeni wakwaCele ongumakhelwane wayo induna. Amadodana akwaCele alimale kanzima okumanje asesesibhedlela. Kuboshwe indodana yenduna encane, kusolwa yona ngokudubula ilimaze amadodana akwaCele. Induna ibulawa nje, ibivele isikulindele ukuthi kungenzeka noma yini kuyona njengoba ibisithuthe inkosikazi yayo yesibili nezingane yayobabhacisa endaweni engaziwa,” kusho umthombo.
ILANGA likhulume nondunankulu wesizwe, uMnu Kwelinameva Sithole, oveze ukuthi uMnu Ngwenya ubebabikela ngesimo esingesihle endaweni yakhe nokuthi kukhona abafuna ukumbulala.
Imizamo yeLANGA yokuxoxa namalungu omndeni ngalolu daba kayiphumelelanga kwaze kwashaya isikhathi sokuloba.
Okhulumela amaphoyisa, uCol Thembeka Mbhele, usuqinisekisile lesi sigameko, wathi kuvulwe icala lokubulala, bekungakaboshwa muntu.