BABOSHWE NGOKLEBE
LUZITHETHELELE uphiko loKlebe ukuthi kungani uMnu Gavin Watson nabaholi beANC, abathinteka enkohlakalweni yamantshontsho enkampanini yodumo, iBosasa, bengavelanga eNkantolo yamaCala eMali, ePretoria izolo ngoLwesithathu.
Laba abavele enkantolo baboshwe ngoKlebe. I-DA ishaqekile ukuthi kungani uMnu Watson obeyisikhulu esiphezulu kwaBosasa - okunguyena futhi ovele kabi kakhulu ebufakazini obethulelwe ikhomishini yeJaji Raymond Zondo, ephenya ngokuthunjwa kombuso - engaboshwanga.
UBrigadier Hangwani Mulaudzi, okhulumela oKlebe, uthe lolu phiko kalunayo ingebhe ukuthatha izinyathelo ngabaholi bepolitiki, yizikhulu ze-ANC noMnu Watson, inqobo nje uma kukhona okuphathekayo.
Kule nkohlakalo yokugwazelwa kwabathile, kuthinteka uNkz Dudu Myeni, owayengusihlalo weSAA, uNgqongqoshe wezeMvelo, uNkk Nomvula Mokonyane, uNgqongqoshe wezimbiwayo, noMnu Gwede Mantashe ongusihlalo we-ANC.
Kwabavele enkantolo izolo, uMnu Angelo Agrizzi, owayeyi- chief operations officer eBosasa - okunguyena obeqhulula odalimede, ethula ubufakazi kwikhomishini yeJaji Zondo - uMnu Patrick Gillingham obeyi- chief financial officer (CFO) emnyangweni wezokuhlunyeleliswa kwezimilo, uMnu Andries van Tonder obeyi-chief financial officer (CFO) nezinkampani ezintathu, i-African Global Operations (ebeyaziwa ngeBosasa phambilini), iSondolo IT nePhezulu Fencing.
Baphume ngebheyili ka-R20 000 umuntu ngamunye. Kuthiwa ibisingaphezulu kweminyaka ewu-15 iBosasa ithola izinkontileka ezisolisayo, zenani elingaphezulu kuka-R12 billion.
UMnu Agrizzi, uMnu Gillingham noMnu van Tonder banikezele ngama- passport abo, icala lahlehliselwa umhla ka-27 kuNdasa (March).
UBrig Mulaudzi uthe akulona iqiniso ukuthi uMnu Linda Mti, owayengukhomishana emnyangweni wezokuhlunyeleliswa kwezimilo naye ubeboshiwe.
“Omunye wabasolwa uphesheya kwezilwandle, simazisile ukuthi uyadingeka, kunencwadi egunyaza ukuba aboshwe, omunye usePort Elizabeth," kusho uBrig. Mulaudzi.