UTHI USEMNINGI UMSEBENZI OMHLALELE WOKUSIZA UMPHAKATHI AWAKHELE
SIMANGALISWA wukuthi kusenabantu abasacwasa abaphila nesandulela-ngculaza isishoshovu esesiphile naleli gciwane iminyaka engaphezu kuka-20 njengoba sithi lolu bhubhane kade lwaba khona futhi kunezinhlaka eziningi okuhlanganisa ezizimele nezikahulumeni - ezifundisa ngaso.
UNkz Sandra Dlamini (49), waKwaMsane, eMtubatuba, uthi ngesikhathi esanda kuthola ukuthi unesandulela-ngculaza, uzame ukuzibulala kwaze kwaba kabili.
Ngesikhathi ethola ukuthi unegciwane, ubesanda kuthola ingane ebilokhu igula njalo, okuthe ngemuva kwesikhashana yadlula emhlabeni.
Uthole ukuthi nayo beyitheleleke ngegciwane.
“Ngiqale ngaba nenkinga, ngizibuza ukuthi ngabe ngoneni kubani ukuba ngingajeziswa ngaleli gciwane. Ngaleso sikhathi bekunzima kakhulu nokuphumela obala. Bekunzima kakhulu ezindaweni zasemakhaya ngoba ngisho ugula ungenalutho, bekuvele kuthiwe yilesi sifo,” kusho yena.
Uthi ngemuva kwesikhashana, uxoxe noninakhulu omyale ngokuthi kumele asamukele isandulelangculaza, angaphili ngokwesaba ngoba ethi uzofa.
Kuke kwaba khona isikhathi lapho ezame khona ukuyoziphonsa ebhulohweni lomfula omkhulukazi, iMfolozi, kodwa kwaba khona abambonayo, wagcina engaziphonsanga.
“Ngike ngazama nokuthola umuthi ofakwa ediphini uma kudishwa izinkomo ngoba ngase ngizwile ukuthi ubulala ujuqu. Nakhona lapho ngehlulekile ngaze ngagcina sengisamukela lesi simo engikusona,” kusho uNkz Dlamini.
Yize uma ekhuluma esezwakala ukuthi kudala wasamukela isimo akusona, kodwa uyakuveza ukuthi kunzima ukuphila ngokudla amaphilisi nsuku zonke.
Uthi ujabule kakhulu ngesikhathi odokotela bemtshela ukuthi sekunekhambi (lokuthithibalisa igciwane), kodwa ubeba nenkinga yokuthi amaphilisi abengekho nhlobo emakhaya lapho ehlala khona, kunalokho bekudingeka aye eThekwini eyowalanda khona.
"Ngokuhamba kwesikhathi, uthi ugcine esekwazi ukuwathola emitholampilo yangakubo, okwenze impilo yaba lula kakhulu. Kunzima khona, kodwa kufuna ube nomqondo, ucabange ujule ukuze ungagcini uhlala unengcindezi ngoba lesi sifo kasiyifuni.
"Kufanele ube ngumuntu okwaziyo ukuhlala umatasa, ungacabangi into ongeke usayishintsha,” kusho yena.
"Njengomuntu osebenza kakhu- lu nemiphakathi yasemakhaya, uthi ubone kunesidingo sokuba asungule inhlangano elekelela, ifundise iphinde yeseke abaphila naleli gciwane.
“Sisungule inhlangano engenzi nzuzo, Isilungiso Support Group, lapho sihlangana khona sifundisane, sidingide nezingqinamba ezahlukene esibhekana nazo.
"Le nhlangano inamalungu angaphezulu kuka-100, okungabantu basemakhaya. Sesize saziqalela nezingadi zethu ukuze sikwazi ukuziphilisa,” kusho yena.
Uthi zisekhona izingqinamba abantu abaningi abasabhekana nazo, ikakhulukazi abashadile, bakhala ngokuthi abesilisa kabafuni ukusebenzisa amajazi omkhwenyana ukuzivikela kulesi sifo.
“Kuliqiniso elingephikwe ukuthi kusenabantu abaningi abangafuni ukwamukela ukuthi banalesi sifo, okuyinto ebuhlungu kakhulu.
"Mina nje senginesikhathi eside abantu bazi ukuthi nginalesi sifo, kodwa namanje kusekhona abathi uma behlangana nami edolobheni, bababaze noma benze amahlaya ngengculaza ngoba bebhekise kimina.
"Ngisho ngingena etekisini, kangesabi uma kukhona ovele akhulume ngengculaza ngoba efuna ukubona ukuthi ngizokwenzenjani, kunalokho ngivele ngingenelele kuleyo ngxoxo ngiqinisekise ukuthi ngibashiya benolwazi,” kusho yena.
Emasontweni amabili edlule, uNkz Dlamini ubengomunye wabantu abenza umehluko emiphakathini yaseMtubatuba namaphethelo, abahlonishwe wuMasipala waseMtubatuba ngemisebenzi yabo emihle.
“Kungenze ngagcwala izinyembezi emehlweni ukuzwa igama lami libizwa kulo mcimbi ngoba lude ukhalo esengiluhambile ngisebenza nemiphakathi kanti indlela iseyinde.
"Uma kusekhona abantu abatheleleka nsuku zonke (ngesandulela-ngculaza) njengoba ucwaningo lusho, kusho ukuthi umsebenzi wami usekude ukuphela.
"Ngifisa ukuthi noma sengidlulile kulo mhlaba, kube nabantu abayothi ngakwazi ukubalekelela ezikhathini ezinzima,” kusho yena.
Uthi akagcini ngokulekelela abanaleli gciwane, kepha amalungu omphakathi amaningi ayamethemba nangezinto ezingaphathelene nalesi sifo, njengoba abanye beya kuyena noma benezinkinga zomazisi.
“Ngibalekelela nanganoma yini abeza nayo kimina ngoba kangifuni kube khona umuntu okhala kimina ngingakwazi ukumsiza,” kusho yena.