INZIMA IMPILO KOKHUBAZEKILE
UBHEKENE nezingqinamba umndeni womfundi waseMthwalume, olimale ngoMasingana (January) 2018, eshayeka umgogodla - waba kwikhoma kwaze kwaba wuNcwaba (August) - njengoba esha amashushu efuna ukubuyela esikoleni, kodwa kunezinkinga ezidalwa yisimo abhekene naso njengamanje.
Zigcwala amehlo izinyembezi kuNkz Nokuthula Cele uma echaza isimo sendodana yakhe, enguSanele Cele (18), obekufanele enze umatikuletsheni eMtwalume High School ngo-2018, njengoba manje kuningi engakwazi ukuzenzela khona ngenxa yokulimala.
Uthi bekuwuMasingana ngonyaka ophelile ilanga likhipha umkhovu etsheni, izikole zivaliwe, indodana yakhe yahamba namalungu omndeni beyobhukuda olwandle oluseduze.
Indodana yakhe uthi ibigxumela emanzini namanye amalungu omndeni, okuthe igxuma ishaya ingqimphothwe, yashayeka kanzima esihlabathini ngethambo lomgogodla, lephuka ngaleso sikhathi.
Uthi iphuthunyiswe esibhedlela isilimele, ezitshela ukuthi yinto ezolungiseka uma isibone odokotela.
Utshele ILANGA ukuthi kube nzima ngesikhathi odokotela sebemchazela ukuthi iphuke ithambo lomgogodla, ngeke iphinde ikwazi ukwenzalutho, isizofana nengane encane ehlale ilele embhedeni.
“Kumanje uphila ngokuhlala efake inabukeni ngenxa yokuthi akakwazi ukuzwa uma sekufanele aye endlini encane, ubona ngoba esezingcolisile. UNkulunkulu emuhle, kwenzeke izimanga nodokotela abebengazilindele njengoba isikwazi ukuphakamisa izandla,” kusho uNkz Cele.
Uthi kumanje indodana yakhe imagange ifuna ukubuyela esikoleni, useyitholele nesikole ezofunda kusona esiseThekwini, inkinga wukuthi kudingeka ithole isihlalo sikagesi esinamasondo.
Enye inkinga athi ibhekene nayo, indodana yakhe, idinga ukufakelwa isigubhu sokuzikhulula njengoba ingakwazi ukuzizwa uma isidinga ukuya endlini encane.
Uthi esikoleni bamtshele ukuthi ngeke bayivumele iqale ukufunda ingakafakwa leso sigubhu futhi singekho isihlalo esihamba ngogesi. “Inkinga enkulu wukuthi usuku abasinike lona esibhedlela ukuba ayofakwa isigubhu, lukude, lungoNdasa (March), sengisabela ukuthi uzosala nasezifundweni," kusho yena.
USanele okumanje uhlala endaweni okugcinwa kuyona abantu abasuke bephuma ezibhedlela kade belimele kakhulu, uzwakala enokuzethemba ngesikhathi exoxa neLANGA.
“Ukulimala kwami kungikhulisile ngokomqondo. Kungenze ngayibuka ngenye indlela impilo. Ngizimisele ngokubuyela esikoleni ngifunde, ngibe ngummeli. Okungijabulisayo wukuthi sengiyakwazi ukuphakamisa isandla.
"Kumanje isikhathi sami ngisichitha ngezincwadi, kangifuni ukuhlala ngibalisa ngokulimala kwami ngoba lokho kuzongikhubaza umqondo.
"Ngiyafisa ukuthola uxhaso lwesihlalo esihamba ngamasondo ukuze ngizokwazi ukuya esikoleni kalula. Lesi esinye (isihlalo) angikwazi ukusihambisa, kufanele ngiphushwe uma ngifuna ukunyakaza,” kusho uSanele.