Elapha okuningi emzimbeni amahlamvu kagwava
Ukuphuza itiye elenziwe ngamaqabunga kagwava noma ukusebenzisa ugwava ngendlela yamaphilisi, kuyasiza ekwelapheni isihudo.
Kulolo cwaningo olwabe lungo-2008 - imiphumela yalo eyashicilelwa embhalweni wocwaningo iJournal of Smooth Muscle Research e-USA - abacwaningi bathola ukuthi isithako esikhishwe kuwo ugwava ( extract), sivimbela ukuhanjiswa yisisu nxa ufake i- caster oil, lokhu bekwenza emagunjini ocwaningo. Lokho kwenza baba nempendulo yokuthi kungani kunenkolelo yokuthi lesi sihlahla siwumuthi wemvelo wokunqanda isihudo. UKUZIMUKA NGOKWEQILE (Obesity)
Ugwava unomhhadlahhadliso omningi ( high fibre) ne- low glycemic index (LGI), okwenza ube nosizo ekunciphiseni isisindo. Lokhu kuthi kwenzeka ngokuthiya isivinini sokuguquka kwesitashi sibe wushukela emzimbeni.
Ngokuvamile ushukela osemzimbeni isibindi siyawuguqula ube ngamafutha bese siwafaka egazini, ngaleyo ndlela umuntu bese eyazimuka. USHUKELA (Diabetes)
Umhhadlahhadliso omningi kugwava uyasiza ekulawuleni isifo sikashukela ngokuthi unensisa ukumunceka kukashukela ukuba ungene egazini. Ngokocwaningo olwenziwe ngo-2010, lwashicilelwa ephephabhukwini lezemfundo, iNutrition and Metabolism, itiye, elenziwe ngamahlamvu kagwava liyasivimba isifo sikashukela esiwu- type 2. Ababhali bombiko, ngocwaningo, basebenzisa itiye elenziwe ngamaqabunga kagwava eselivunyiwe njengenye yezinhlobo zokudla ezisetshenziswa ukwelapha, phecelezi Foods for Specified Health Uses, futhi kumanje seliyathengiswa eJapan. Lokhu kugcizelela ubumqoka bephuzu lokulawula izinga likashukela ekunqandeni isifo sikashukela i- type 2 diabetes. “Ugwava une- low glycemic index, ngisho nalabo abaguliswa wushukela bangawudla, uvimbela ukwehla nokwenyuka kwezinga le- insulin nele- glucose emzimbeni," kusho uDkt Revathi Sunduramurthy kwabeMedical Daily. UMDLAVUZA WESISU
Izithako ezikhishwe emaqabungeni kagwava zingaba wusizo ekulapheni umdlavuza wesisu. Ama- compound atholakala kuwona ane- lycopene, i- quercetin no-vitamin C, okusebenza njengezikhucululi ezithiba umonakalo obangelwa wukungcola komzimba.
Ngokombhalo iCancer Letters, ucwaningo olushicilelwe ngo-2006 luveza ukuthi amafutha emvelo ( essential oils) atholakala kugwava angasehlisa isivinini sokwanda komdlavuza wesisu ngenxa yokuba kukhona kuwona lokhu okulandelayo: i- nerokidiol, i- caryophyllene, i- beta bisabolene, i- p-selinene, i- aromandreno, i- tannis, i-beta sitosterol, i- leucocyanidins ne- triterpenoids.
UMDLAVUZA WAMANKWAHLA
Amaqabunga kagwava acebe nge- lycopene emqoka ekulweni nomdlavuza wamadoda, owebele nowasemlonyeni.
Amandla awo athikameza ukukhiqizeka kwe- androgen eba kubantu besilisa, okuyiyona eyenza kukhule ama- cell ayimbangela yezinhlobo ezithile zomdlavuza wabesilisa, njengokusho kocwaningo lwangonyaka ka-2012 olwashicilelwa kwiphephabhuku lesayensi iCancer Prevention Research.
AMAFUTHA EGAZINI
Ngokocwaningo olushicilelwe kwiphephabhuku iNutrition and Metabolism, amahlamvu kagwava ungawasebenzisa kudlule izinyanga unciphisa ngawo uhlobo lwamafutha olubizwa nge-LDL, kodwa ingabikhona imiphumela emibi ( side effects). Kanjalo nokudla isithelo sikagwava, nakho kungelekelela ekwehliseni
amafutha egazini. Umthombo: medicaldaily.com