Ibadumazile i-season entsha yoZalo
KUBE nokudideka kubabukeli abaningi ngesikhathi kuqala i- season entsha yoZalo olutshengiswa kuSABC 1 ngo20:30 phakathi nezinsuku. NgoLwesine olwedlule abalo mdlalo bamemezele ngokusemthethweni ukuthi kuzoqala i- season entsha ngoMsombuluko esisuka kuwo. Njengoba kuqale le season kunabadlali abadala abahambile, kwafika abasha.
Kodwa ngesikhathi kusakazwa isiqephu sokuqala se- season entsha kube nokudideka kubabukeli abaningi ababone sengathi lo mdlalo usutshintshwe kakhulu, kwaba sengathi uqalwa kabusha, akuwona umdlalo oqhubekayo.
Ngaphandle kwalokho abanye baphinde bakhala ngesigameko sokubanjwa kwenkunzi esivelile lapho kuvele kwagcwala khona amaphara esontweni. Abebekhononda babone sengathi lesi sigameko sibe nehaba futhi sangaveza ubuqiniso bezigameko zokubanjwa kwenkunzi ngendlela esenzeke ngayo.
Abanye bababukeli balo mdlalo abababele kwiTwitter baphawule kanje:
@thabi_simone: Ngicabanga ukuthi Uzalo selwenza ngokweqile ebugebengwini. Isona sibonelo lesi eningasinika intsha? Hhayi sekuyisikhathi sokuthola okunye esingakubuka ngo20:30
@khophoLee: Ngisho ikilasi lezibalo kalididi njengesiqephu sanamuhla soZalo.
@ngoepekh: Kubabhali, abakhiqizi nawo wonke umuntu obe nesandla kwisiqephu sanamuhla nenze umsebenzi oncomekayo.
@onndwy_mulwy: Ngiyafunga namhlanje besibuka ifilimu yaseNigeria.
@MarioThaJiggy: UZekhethelo useyiphoyisa manje?
@Kenneth12071931: Uzalo lubukeka sengathi iLokshin Bioskop engenabhajethi. Kuzokhumbuleka ukuthi uZalo kalusiwo umdlalo wokuqala ukubuya nezinguquko eziningi uma kungena i- season entsha, eyenziwa kuze kube sengathi umdlalo uqalwa kabusha. Lokhu kuke kwenzeka kwiGeneretions The Legacy noMuvhango. Nangesikhathi le midlalo ishintsha kwaba nokuvungama kubabukeli. U-Ayanda Mthiyane wenkampani ekhulumela Uzalo iDreamcatcher uthe: “Njalo uma kuqala isizini entsha Uzalo luletha abalingisi abasha luvalelise kwabanye abasuke bekade bethandwa. Kuyinto eyejwayelekile ukuthi ababukeli baphatheke kabi uma kuhamba abanye babalingisi akade sebebathanda futhi bebazi.
“Esikwaziyo wukuthi unyaka nonyaka ithalente esisuke sililethile lenza ezibukwayo ligcine selizenzele ugazi kubabukeli. Imibono esiyithole ezinkundleni zokuxhumana ibimihle. Abantu mabaqhubeke nokubuka Uzalo,” kuchaza yena.