Izinkinga ziyaxazululeka ngaphandle kodlame
IYADABUKISA indaba yokushona komfundi ngesikhathi kubhikisha abafundi eDurban University of Technology (DUT) kuleli sonto. Sithatha leli thuba ukuzwakalisa ukuzwelana nomndeni walo mfundi, kulesi sikhathi esinzima obhekene naso.
Ukubhikisha kwabafundi kulesi sikhungo semfundo kuyingxenye yemibhikisho eqhubekayo kwamanye amanyuvesi kulesi sifundazwe naseGauteng, lapho abafundi baseWitwatersrand University beqhinqe emagcekeni ale nyuvesi, bedube nokudla ngoba befuna phakathi kwezinye izinto abafuna zenzeke, ukuba kubhaliswe abafundi abakweleta lesi sikhungo.
Kuyilungelo labafundi ukubhikisha, bazwakalise ukungenami kwabo nxa kukhona abanganelisekile ngakho, kodwa inkinga ngemibhikisho yabafundi eNingizimu Afrika wukuthi ijwayele ukuhambisana nodlame olungenamqondo nokucekelwa phansi kwempahla yomphakathi, eyakhiwe ngemali yabakhokhi bentela abayisebenzele kanzima.
E-DUT nje, sekufana nemfashini ukudutshwa kwamakilasi nokubhikisha kwabafundi okuhambisana nodlame uma kuqala unyaka, njengoba lokhu sekwenzeke iminyaka eminingi ilandelana. Le ndlela yokwenza izinto nokuziphatha kwabafundi, ingaba nomthelela ekupheleni kwesithunzi salesi sikhungo ngoba yenza umuntu obukelayo nabaqashi abaphethe izinkampani bazibuze ukuthi umfundi oqeqeshwe kule nyuvesi unhloboni yomuntu.
Lokhu kungaba nomthelela omubi wokuba abaqeqeshwe kulesi sikhungo bangawutholi umsebenzi uma sebephothule izifundo zabo. Emazweni ahlelekile, lapho abantu beyihlonipha imithetho yezwe, umfundi wasenyuvesi uthathwa njengomuntu oyisifundiswa, osebenzisa umqondo, okuthi nxa kunezinkinga, azixazulule ngokuhlala phansi etafuleni nabaphathi besikhungo, inkinga ilungiswe ngomlomo.
Uma kwenzeka kuba nombhikisho, lokhu kwenzeka ngendlela enokuthula, engaphazamisi ilungelo labanye abafundi abazimisele ngokuqhubeka nokufunda. Kuyajabhisa ukuthi kuleli lakithi ababhikishi kabalihloniphi ilungelo labasuke befuna ukuqhubeka nabakwenzayo, kungaba wukufunda noma wukuqhubeka nokusebenza nxa kunesiteleka emsebenzini. Osekubuye kona izinto ezikhungweni zemfundo ephakeme, wukungenelela kwamaqembu epolitiki ezindabeni zabafundi nemibango yezikhundla zokwengamela imikhandlu yabafundi. Cishe zonke izikhungo zemfundo sezinezimpiko zentsha zamaqembu epolitiki, esingabala lapha olwe-EFF, okweANC, neDA.
Lesi simo sesidale ukuba kube nokuncintisana okushubile phakathi kwalezi zinhlaka, ukunxenxa amavoti abafundi, okuba nomthelela wokufuna ukuzigqamisa ezikhungweni ngokuqala imibhikisho noma singekho isidingo. Ngeke leli zwe liye phambili uma lo mkhuba wokujwayela ukubhikisha ngodlame uqhubeka, kungekho okhuzayo.
IsiZulu sithi, inkunzi isematholeni; sifisa ukuba ngelinye ilanga intsha yakithi ikhombise ukukhula ngengqondo, ifunde ukuxazula izinkinga ngomlomo, hhayi ngodlame.