Uvumbuke kweleNFD obengumdlali weChiefs
Ubhekwa yiMbombela United
UVUMBUKE ekilabhini egijima kwiNational First Division (NFD) umdlali odabuka eZimbabwe ozakhele igama egijima kwiKaizer Chiefs.
ILANGA lithole ngemithombo yalo ukuthi iMbombela United edlala kwiNFD ihlola uKingston Nkhatha (34) odume kwiChiefs.
UNkhatha ugcine ukubonakala ebholeni lakuleli ngesizini eyedlule. ISuperSport United abegijima kuyona ayingazange iyivuselele inkontileka yakhe.
Selokhu exoshwe yiSuperSport ubeduve ekhaya engenamsebenzi.
IMbombela esembangweni wokungena kwi-Absa Premiership imbizile ngoLwesibili ngenhloso yokuba izomhlola.
Izolo ngoLwesithathu ugijime kowesihle obuphakathi kweMbombela nekilabhu yaseMozambique obuseMpumalanga.
Leli phephandaba libuza uMilton Dlamini ongumqeqeshi weMbombela ngalolu daba ukuqinisekisile ukuthi bayamhlola.
“Simmemile ngenhloso yokuzomhlola.
"Okwamanje akukho esisakunqumile ngaye sizomubheka nje bese sinquma.
"Siyawazi amagalelo akhe kodwa kumqoka ukuthi sibheke isimo sakhe ngoba kade agcina ukudlala.
"Siyamdinga impela umgadli njengoba sezibheke entanjeni kodwa angeke sivele sisayinise noma ngubani, sizozinika isikhathi sibheke ukuthi angasisiza yini,” kusho uDlamini.