Usenethemba lokusinda ezembeni owePMB Utd
Ubona umehluko ofike noTinkler
INHLANSI yethemba kumnikazi weMaritzburg United ngekilabhu yakhe njengoba ekholwa wukuthi izolivika izembe.
IMaritzburg izobhekana nePolokwane City kowe-Absa Premiership kusasa ngoLwesihlanu ngo-20h00 eHarry Gwala Stadium, eMgungundlovu.
Iya kulo mdlalo nje, ibambe ibhuleki emsileni we- log.
Izingqapheli zibona le kilabhu izogijima kwiNational First Division ngesizini ezayo.
UFarook “Ntshebe” Kadodia ongumnikazi weMaritzburg uthi ubuyelwe yithemba emuva kwengxoxo abe nayo nabadlali bakhe.
“Selokhu kufike u-Eric Tinkler umehluko mukhulu nemimoya kubadlali uyayibona iphezulu bakulangazelele ukulwela ikilabhu manje.
Abadlali abebenezinkinga ngibile nomhlangano nabo ngamunye sazixazulula.
Lo mdlalo wePolokwane yiwona engikholwa ukuthi sizophendula ngawo amatafula.
Uma sinqobe wona noma kanjani zizojika izinto. Engifuna ukukubeka kucace wukuthi asiyi kwiNFD ngesizini ezayo sizobe sisadlala kwi-Absa Premiership,” kusho uKadodia ngokuzethemba.
IMaritzburg selokhu kuqale isizini ayikanqobi mdlalo ekhaya okwenza abalandeli bayo babe novalo.
“Siyakuqonda ukuthi asikanqobi mdlalo kodwa sizoqala ngalona.
Ngiyacela ukuba abalandeli baphume ngobuningi babo bazoseseka ngoba siyabadinga kulobu bunzima esibhekene nabo,” kusho uKadodia.
Abadlali okubhekwe ukuba batakule iMaritzburg abebehlelwe yifomu ngoFortune Makaringe okuvela ukuthi ngesizini ezayo uzobe edlala kwi-Orlando Pirates njengoba eseqede konke nayo noSiphesihle “Mbesuma” Ndlovu naye okuvela ukuthi izinkinga abenazo nekilabhu sezixazululekile.
Kuvela ukuthi ubefuna ukuhamba kwiMaritzburg yabe isithembisa ukuthi izomdedela ngokuphela kwesizini.
Ukhonjwa kwiMamelodi Sundowns nokho kuthiwa lo mdlali akakuthandi ukuyodlala kuyona ufuna ukuya kwiKaizer Chiefs noma kwiPirates.
Imidlalo ye-Absa Premiership isiyonke ngempelasonto iqhathwe kanje:
KUSASA NGOLWESIHLANU
EHarry Gwala Stadium: Maritzburg United vs Polokwane City 20h00. NGOMGQIBELO EFNB Stadium: Kaizer Chiefs vs Orlando Pirates 15h30.
EMakhulong Stadium: Highlands Park vs Bidvest Wits 15h30. EGoble Park: Free State Stars vs Chippa United 18h00.
EKing Zwelithini Stadium: AmaZulu FC vs Cape Town City FC 20h15. NGESONTO EPeter Mokaba Stadium: Baroka FC vs Bloemfontein Celtic 15h30.
ESugar Ray Xulu Stadium: Golden Arrows vs SuperSport United 15h30.