UTHEMBISA IZINGUQUKO UMQEQESHI WE-SHARKS
UTHEMBISA ukwenza izinguquko ezinqala umqeqeshi weCell C Sharks uRobert du Preez ( osesithombeni) emdlalweni wokugcina wokuzifudumeza ngaphambi kokuqala kwemidlalo yeSuper Rugby.
ISharks izobhekana neBlue Bulls kowokubungani ngoMgqibelo ngo-14h00 e-Ashton College, eBallito. ISharks iya kulo mdlalo nje iphuma esibhaxwini sika-19-14 esithole kwiLions eKapa ngeledlule.
"Ngizokwenza izinguquko kulo mdlalo. Inhloso yethu wukunikeza bonke abadlali ithuba ikakhulukazi laba esizohamba nabo ukulungiselela umdlalo wethu wokuvula neSunwolves.
"Abadlali abaningi besibaphumuzile emidlalweni wethu neLions ngenhloso yokubanika isikhathi esanele sokuphumula kwazise abanye kade bedlala eJapan kanti abanye bebeyingxenye yeqembu lesizwe.
"Sidlale kahle kakhulu neLions, kuningi okuhle okukhonjiswe abafana abancane nengithemba ukuthi bafunde lukhulu kulo mdlalo.
"Le midlalo yeSuper Hero ibe yimpumelelo. Indlela abalandeli abakhombise ngayo intshisekelo iyamangalisa, kufanele iphindwe, ngisho nabadlali abawuvali umlomo ngayo.
"Okuhle wukuthi sibuye kulo mdlalo bonke abadlali bewumqemane kungekho abalimele,” kusho uRobert Snr.
ULindiwe Nkosi okhulumela iSA Rugby uthe: “Le midlalo ibe yi-mpumelelo kakhulu kanti abantu abaningi bayijabulele kakhulu bacela nokuthi siphinde sibahlelele futhi uhlobo lwale midlalo.
"Ngiyathemba ukuthi kuwasebenzele amakilabhu aseNingizimu Afrika ukuzihlanganisa nale midlalo," kusho uLindiwe.
Umdlalo wokuqala ekhaya weSharks weSuper Rugby uzokuba mhla ka-23 kuNhlolanja (February) nalapho izogadulisana khona neBlues eJonsson Kings Park Stadium, eThekwini.