IZOKHIWA NGAMAFOSHOLO KWI-WILLIES MCHUNU LEGACY RUN
IZOKUBE ikhiwa ngamafosholo imali kwiWillies Mchunu Lagacy Run ezokuba ngoMgqibelo ozayo isukela edolobheni eMtshezi isongwe ezinkundleni zemidlalo eWembezi.
Lo mjaho uqale nyakenye kuyi10km kanti nonyaka usunyukile njengoba uyi-21km lapho izingqwele zizohlomula ngo-R15 000 esigabeni esivulelekile kwabesilisa nabesifazane kuthi isibili sigoduke no-R8000, kanti abazongena isithathu bazuze u-R7000 ngokuhlukana kobulili.
Nakwi-10km abazonqoba bazophindela emakhaya behleka bodwa njengoba izingqwele zakhona zizogixabezwa ngo-R10 000 esigabeni sabesilisa nabesifazane. Lo mjaho uhlelwe umnyango WezemiDlalo waKwaZulu-Natal oholwa nguBongi Sithole-Moli kanti inhloso yawo enkulu ukuhlonipha uNdunankulu wesifundazwe, uMchunu ongowokuzalwa eMtshezi.
Kulo mjaho kuthiwa kungenzeka abe khona undunankulu ezokwamukela izingqwele.
UThabo Mofokeng womnyango wezemidlalo utshele ILANGA ukuthi sekuqaliwe ukwamukela imingenelo yalo mjaho. Uthi abafuna ukubamba iqhaza kuwo bangangena kwi-website ethi: www.finishtime.co.za noma baye emahhovisi kamasipala iLangalibalele lapho bezothola khona imingenelo.
“Inhloso yalo mjaho ukuhlonipha undunankulu kwazise uyazifela ngezemidlalo. Lo mjaho sithe asiwenzele lapho ezalelwe khona njengoba uzodlula ngasemzini wakhe. Kungekudala sizowukhulisa ube yiMarathon ukuze usize abasubathi abafuna ukwenza izikhathi zokubamba iqhaza kwiComrades Marathon neTwo Oceans Marathon ngokwehlukana,” kusho uMofokeng oqhube wathi ngempelasonto yomjaho umnyango uzokube nezemidlalo ezinhlobonhlobo.
Abafuna ulwazi ngalo mjaho bangaxhumana noCeli Makhoba kwethi: 0731758725 noma uNathi Mchunu kwethi: 0734134417.