UFANISE IZIKHULU ZEBHOLA NEZILWANE

UFANISE izikhulu zebhola nezilwane uNhlanhla Shabalala ( osesithombeni) weSouth African Football Players Union (Safpu) njengoba egxeka ukumiswa ukujima kukaRodney Ramagalela yiPolokwane City ngenxa yokugoloza ukuvuselela inkontileka nale kilabhu.

URamagalela usayine inkontileka yesibambiso neHighlands Park.

IPolokwane inqume ukumumisa ukuziqeqesha nayo yize esasalelwe yizinyanga ezingu-6 kwinkontileka yakhe nale kilabhu.

Kuthiwa umiswe nguBernard Molekwa oyiphini lo mqeqeshi kule kilabhu obeyalelwe ngumnikazi wayo uJohnny Mogaladi.

UShabalala ugxeke izikhulu zebhola wathi zibuye zenze ubulwane kubadlali.

Uthi akufanele engabe uRamagalela uphethwe ngale ndlela kwazise kade ewa evuka nale kilabhu.

Uthi udaba lukaRamagalela baphezu kwalo futhi bazimisele ngokuthola isisombululo.

URamagalela ekhuluma ohlelweni lukaRobert Marawa olubizwa ngeSports Worldwide (MSW) uthe ibuhlungu inhliziyo yakhe njengoba evinjwa ukwenza umsebenzi awuqashelwe ngenxa yobulwane besikhulu.

Uthi usegcina ngokuya nje ejimini abuke- le bese kuqediwe agoduke.

Uthi akakaze ayinikwe incwadi emumisayo kodwa akajimi.

Uveze ukuthi le kilabhu imkweleta enkulu imali njengoba ingakaze imnike eyokusayina abebevumelene ngayo.

Uthi konke okwenzeka kuyena utshelwa ngomlomo nje qha akukho okubhalwa phansi.

Uthi sinzima isimo kwamanye amakilabhu abadlali bathwala kanzima uma sebefuna ukuhamba.

NoThobani Mncwango obedlala kule kilabhu uthi kugcine kuphelile ngaye ebholeni emuva kokuba ecindezelwe yile kilabhu.