KUKHUZWA UMHLOLA KA'ZODWA WABANTU'
Bakhuza umhlola ogilwe nguZodwa Wabantu
ISAZI sezamasiko sibona uZodwa Libram - odume ngelikaZodwa Wabantu - ezidonsela amanzi ngomsele njengoba ezithengele ibhokisi lomngcwabo likanokusho.
USolwazi Velaphi “VVO” Mkhize uthi ngokwesintu akuvumelekile nhlobo ukuthi umuntu athi esadla anhlamvana azithengele ibhokisi, kunalokho kujwayeleke ukuthi kube ngabantu abadala abavumeleke ukukhuluma ngokufa nezifiso abafisa zifezekiswe uma sebedlulile emhlabeni.
“Kuvame ukuba ngogogo nomkhulu asebegugile impela abajwayele ukukhuluma ngezifiso zabo, okuhlanganisa ukuthi bafuna ukufihlwa kuphi kanjani. Lokhu komuntu omusha nje ovele athenge ibhokisi, wukuzibizela umshophi nje,” kusho uSolwazi Mkhize.
NgoLwesibili kumangale abaningi ezinkundleni zokuxhumana ngesikhathi uZodwa, ongumdansi waseNingizimu Afrika, ozakhele igama nabalandeli ngokudansa engalifakile idilozi, eveza ukuthi usezithengele ibhokisi ayongcwatshwa ngalo uma efa, elibiza u-R150 000.
Le ntokazi, ebonakala ingenza noma yini ukuhlala isematheni, ithi kayifuni nje ukuthi uma isifile bese kuthiwa beyingenamali, yingakho ikhethe ukuba izithengele ibhokisi eyongcwatshwa ngalo.
“Ngichithe u-R150 000 ngithenga leli bhokisi. Ngabe wena usukulindele yini ukufa noma uma usufile umndeni wakho uyolokhu ugijima uzama ukuhlanganisa?” kubuza yena ekhasini lakhe le-Instagram.
Okuxake abaningi wukuthi uZodwa uze wangena nakulona leli bhokisi, walala kulona, kubonakala nje ukuthi kakumkhathazi nhlobo lokho. Abalandeli bakhe bakhale ngefosholo lesiliva ebeliphethwe ngowesilisa obemi eduze kwakhe, babuza ukuthi ngabe nalo leli fosholo ulithengile yini noma libe yisipho ngemuva kokuthenga leli bhokisi.
“Abantu abamnyama bayesaba ukukhuluma ngokufa, kangifuni nje uma sengifile bese kuthiwa uZodwa Wabantu ufile, kayikho imali yokuba angcwatshwe,” kusho yena.
Abanye babonakale bemeseka kulesi senzo sakhe njengoba beveze ukuthi kayikho into ethusayo kulokhu akwenzile ngoba ukuba nomshwalense wokufa kuyafana ncamashi nokuthi ukhokhela ibhokisi.
“Umehluko wukuthi uZodwa usezikhethele ibhokisi lakhe, kodwa wena onomasingcwabisane kawukalikhethi,” kusho u-@snamzozo.
Umlingisi emdlalweni owuchungechunge, uZalo, uNokuthula “Noxy” Mabika, ubonakale ekweseka lokhu okwenziwa nguZodwa njengoba ebhale ngezansi kwalesi sithombe sakhe elele ebhokisini, wathi “yes baby”.
Yize bekhona abalandeli bakhe abebekhombisa ukumgxeka ngalesi senzo, uthe akaboni lutho olungalungile ngaso kepha uyazilungiselela ukuze kuthi mhla efa abe esenalo ibhokisi.
Imibono yabalandeli:
U-@moseskakinga uthe:
“Ngiyasola udla izidakamizwa lona, ukhona umuntu osile ovele enze nje?”
U-@ngwenyazanele40 uthe: “Ngiyakuthanda impela Zodwa, kodwa hhayi lokhu okwenzayo kuxakile.”
U-@sanelisiwebhengu uthe: “Ngeke sisi Zodwa, uma usukulungele ukufa sicela ungasifaki thina. Thina sisadla impilo ngesipuni, kasikakulungeli nje lokhu.”
U-@dawnthandeka_king uthe: “Kodwa Zodwa... Haweee maaaa”
U-@kanyaphongelo uthe: “Kangimsoli nje ngalokhu akwenzayo ngoba vele indlela aziphethe ngayo iyasho ukuthi usezofa.”
u-@thenjiwecomedy uthe: “Kungaba ngcono uma uzofika ezulwini engakapheli amahora awu-24 ngalelo bhokisi.”
u-@mrkachibe uthe: “Zimbili kuphela izinsuku ezibalulekile empilweni yomuntu, olokuzalwa nothola ngalo ukuthi kungani uzelwe.
“Usuku ofa ngalo kalubalulekile ngoba vele usuke ungasaboni lutho. Ungalikhetha nje ibhokisi, uthole ukuthi uyofa ngokudliwa yibhubesi noma ulahleke nebhanoyi laseMalaysia.”